كنت فاكرك بسمة هالـــّـه

كنت فاكرك بسمة هالـــّـه

تمسح الحزن القديم

كنت فاكرك شمس طالـــّـه

بعد طول أمطار وغيم

كنت فاكرك نجم عالى

جاى ينور ف الليالى

جاى يخلى القلب يفرح

والربيع ف عيونه يطرح

واللى فات اهو فات وولى

انتى نجم حقيقى ولا

انتى وهم ف حلم جالى

كنت فاكرك بيت صغير

كل ركن فيه منور

يلقى قلبى فيه براحه

ينسى حزنه وطول جراحه

يمشى جنبه يلقى ضلة

انتى بيت حقيقى ولا

انتى شئ غريب يحير

كنت فاكرك يا حبيبتى

غنوتى وشطى وسفينتى

والشوارع والمداين والبلاد

وابتسامة جات لقلبى ف الميعاد

انتى دنيا تانية هاللا

انتى دنيا حقيقى ولا

انتى وهم ف قلبى عشتى

وييجى الخريف

وييجى الخريف

ويزيد الحزن جوايا

كأنه محوش لقلبى

طول السنة أحزانه

وييجى الخريف

وتزيد الغربة جوايا

وقلبى يتوه فى أوطانه

واحس أوراق العمر

زى أوراق الخريف

تتشبث بالخيط الضعيف

وتصرخ بالصوت الحفيف

وتحلم بيوم الربيع

يلملمها فى أحضانه

وييجى الخريف

وارجع لأيام الطفولة

وسنين حياتى الأولى

لما كان القلب أخضر

لما كان العمر أخضر

لما كان حتى الخريف

بييجى أخضر

مهما كانت ألوانه

وف لحظة تشبه تمام

ليلة شتا

من كتر ما فيها أحلام

وأمانى ميتة

وقلبى فى عز حرمانه

افتكرتك معرفش ليه

لقيتك فى قلبى وحواليا

حسيت بقلبى

لسه فى مكانه

ولقيتنى بعد بعاد وغربة

باتمنى ألقى بين إيديكى صحبة

وينهى الحزن فيضانه

ولقيتنى فى عز اشتياقى للربيع

بالجأ إليكى

لأنك تمللى

ربيع سابق أوانه

خريف 94

كل عيد للحب وانتى

كل عيد للحب وانتى

تفضلى صابرين حبيبتى

تعشقينى واعشقك

تملكينى واملكك

تكتبينى فوق جبينك

يا حبيبتى . . واكتبك

عثمان أحمد عثمان .. هتعيشوا حياتكم بالمجان

يدفعنى الفضول والفضول فقـــط إلى متــــــابعة مســـلســــل الدالى وســــبب فضــــولى هذا أن المســـلســـــل مستوحى من قصــــــة حيـــــــاة عثمان أحمد عثمان مؤسس شركة المقاولون العرب وبسبب هذا المسلسل أيضاً أطالع مذكرات عثمان أحمد عثمان التى كتبها بعنوان صفحات من تجربتى
ولا شك أن بالكتاب دروس مستفادة ولكن لأن الظرف السياسى يطل برأسه بين صفحات الكتاب ولأن المذكرات كتبت فى عهد السادات (إبريل 1981) فكان لابد أن يكون فى المجمل لصالح عهد السادات وأن يجامله ولو على حساب ما هو معلوم من التاريخ بالضرورة ففى صفحة 136 يقول بالنص
ولكن كل ما أستطيع أن أقوله الآن إننى بصدد كتابة تجربتى الشخصية ولست بصدد كتاب لأسجل حال مصر التى وصلت إليه إلى أن أنقذتها الثورة التى كان الرئيس السادات أول من نسج خيوطها
وهكذا يجامل الرجل السادات ويذكر أنه صاحب فكرة الثورة وليس عبد الناصر وهى مجاملة أقل ما يمكن وصفها به أنها على حساب التاريخ وتطعن الحقيقة فى شرفها ولا يشفع له أنه كان صديق السادات ووزيراً فى عهده وكان أيضا صهره حيث أن إبن عثمان تزوج من إبنة السادات
وبتأمل بسيط يمكننا إدراك كيف يكتبون التاريخ فى بلدنا ... فهو يكتب دائماً لصالح الأقوى حتى لو أضطر كاتبه أن يلوى عنق الحقيقة .. وبالمثل فعل الذين كتبوا التاريخ فى عهد عبد الناصر فقد ظلموا محمد نجيب وقتلوه معنوياً ومازال الكثيرين إذا ما سألتهم من هو أول رئيس لمصر سيقولون بدون تردد أنه جمال عبد الناصر
وحتى فى عصر مبارك أصبح لا تأتى ذكرى حرب أكتوبر إلا ويصبح الحديث عن الضربة الجوية الأولى هو كل تاريخ تلك الحرب .. كما ظلم الجميع الملك فاروق وشوهوا عهده .. وهكذا
أما عن المسلسل فما زال فريق العمل ينكر أى علاقة بين المسلسل وبين حياة عثمان أحمد عثمان ولا أعرف لماذا يصرون على الكذب كما لو كان استنباط عمل درامى من قصة حياة شخصية مثيرة مثل عثمان أحمد عثمان يعد عيباً أو فعلاً مشيناً وإذا لم يكن سعد الدالى يشير ولو من بعيد لعثمان أحمد عثمان فمن يكون ذلك الرجل الذى كان صاحب أكبر شركة مقاولات ثم أصبح وزيراً ولماذا يظهر السادات فى المسلسل. ومن يقرأ مذكرات الرجل سيجد بالفعل تشابهاً كبيراً وليس تطابقاً بالفعل .. حتى أن كلمة إنت مين التى يبدأ بها تتر المسلسل يقول عنها عثمان أحمد عثمان فى مذكراته أن هذا السؤال الذى وجه له فى مواقف عديدة كان علامة فارقة فى مشوار حياته
أما عن أداء نور الشريف فحدث ولا حرج فنور الشريف هو دائماً نور الشريف أى أن سعد الدالى مثل الحاج أحمد عفواً أقصد الحاج متولى .. نفس الأداء الإستعراضى نفس الشخصية التى لا تهزم والتى على حق دائماً ولا تنطق أبداً عن الهوى بل هى العدل المطلق فمن غير الحاج متولى يستطيع أن يقسم الجدول بين زوجاته ويعدل بينهم بهذه الحكمة المتدفقة .. حتى عندما قدم شخصية مبارك فى مسلسل إذاعى منذ سنوات لم يقترب من طريقة الرئيس من قريب أو من بعيد كان فقط نور الشريف .. كعادته دائماً
تذكروا نبرة صوته فى أى عمل له والطريقة التى يصوب بها نظرته نحو خصومه وبريق الحكمة والذكاء الذى يقفز من عينيه .. هو بذاته لا يتغير أبداً
بل إذا قمت بعمل مونتاج بخيالك وانتزعت مشهداً كاملاً من إحدى روائعه ووضعته فى عمل آخر فى مكان مناسب لاتسق الناتج الجديد تماماً بدون أى خلل ولن تشعر سوى بفارق بسيط
حقاً رحم الله أحمد ذكى الذى لا أشك لحظة فى أنه كان يستطيع أن يقوم ببراعة شديدة بأداء دور أم كلثوم

وظائف للمسلمين فقط

وصلنى هذا الإيميل من جروب خاص بالتوظيف

ولا تعليق على هذا الإعلان سوى أن أقول

أن أسباب البطالة بمصر كثيرة جداً

يزيد عليها أن تكون مسيحياً

إشاعات . . الريس ماااات

إن سمعت عن موت الرئيس

فالخبر . . إشاعة


وإن سمعت عن موت المصريين جميعاً

فالخبر . . حقيقة

بين عرب 48 وأقباط مصر

شمعى: هاى
ياسمين: اهلا
ياسمين: كيفك
شمعى: الحمدلله
شمعى: عندى مقالتين عن فلسطين احب اعرف رايك فيهم
ياسمين: ابعثهم على الايميل
شمعى: هم فى المدونة انا حاطط جوجل فيها اكتبى فلسطين وخليه يبحث جوه المدونة
ياسمين: طيب حدخل اشوفهم واقول لك راي
شمعى: لما تلاقيهم قوليلى
ياسمين: لقيتهم بس لحظة ابدا اقرا
شمعى: اوك

ياسمين: قريت اول واحد بالنسبة للاسلمة
شمعى: ها
ياسمين: انا اعارضها طبعا لان الوطن لكل الشعب وليس لفئة على حساب اخرى
شمعى: بالظبط
ياسمين: فالمسيحي مثلي تماما له جميع الحقوق
شمعى: تمام
ياسمين: ثم ان كثير من الناس الوطنيين والمقاومين ضد اليهود هم المسيحيون
ياسمين: فمنهم جورج حبش
ياسمين: ثم البطريارك عطا الله حنا
ياسمين: الذي مواقفه رائعة فعلا
ياسمين: وعزمي بشارة من عرب 48
ياسمين: فهم ايضا مثقفون ومتعلمون تماما مثلنا
ياسمين: ثم ان الانسان لا يقاس بدينه بل بفكره
ياسمين: وعقله واتزانه
شمعى: بس انتى معايا انهم ظلموا القضية لما اسلموها
ياسمين: طبعا
ياسمين: عشان هيك انا ضد الحركات المتعصبة
شمعى: تمام
ياسمين: لانهم قسموا الشعب احنا وانتوا
ياسمين: وخلونا كفار
شمعى: خلوا مين كفار؟
ياسمين: الناس العاديين
ياسمين: حتى المسلمين يعني
شمعى: اها
ياسمين: انت مسيحي؟
شمعى: اه
ياسمين: تاكد ان الامر لم يغير شيء عندي فالمهم الانسان
شمعى: جميل
ياسمين: انا على فكرة من الناس اللي بتايد انه ابعاد الدين عن قضايا المجتمع
شمعى: ولو ان فى مصر الوضع بين الطرفين بقى شوية صعب
ياسمين: شفت من خلال المدونات
ياسمين: شوف كمان عندنا فبعض الاحيان في مشاكل
شمعى: تخيلى مفيش شهر بيعدى غير لما نسمع عن مشكلة
شمعى: الجديد فى مصر ان الاحداث انتقلت للاسكندرية
ياسمين: بس الحقيقة انا من بلد ما فيها مسيحيين يعني ما بتخالط معهم بشكل يومي بس طبعا حتى لو كان ما اظن تكون مشكلة
شمعى: الاسكندرية كان صعب يحصل فيها كده
ياسمين: ربنا يعينكم
ياسمين: عارف سبب كل هذا شو
ياسمين: التعصب
شمعى: اكيد
شمعى: والتعصب وراه الجو اللى عملوه الاخوان
ياسمين: والفكر الوهابي اللي جاي ما بعرف من وين
شمعى: من السعودية هو فيه غيرها
شمعى: تخيلى
شمعى: احنا فى مصر كمسيحيين دايما متهمين بالخيانة
شمعى: او اننا ناقصى ولاء للوطن
ياسمين: زينا في اسرائيل
ياسمين: انا فاهمتك
شمعى: انتوا مين قصدك الفلسطيين؟
ياسمين: لاننا بنفس الوضع ويمكن هذا اللي مخلينا متماسكين اكثر شوي
ياسمين: لا
شمعى: امال
ياسمين: العرب اللي داخل اسرائيل
شمعى: اه بالظبط
ياسمين: يعني فلسطينيين 48
شمعى: عرب اسرائيل
ياسمين: هو انا ما حكيتلك؟؟
شمعى: لا
ياسمين: بدي اطلب طلب
شمعى: اامرى
ياسمين: اخر مرة تقول عرب اسرائيل
شمعى: ليه
ياسمين: بكره هذه الكلمة
ياسمين: لان انا منهم
شمعى: هو التعبير ده فيه مشكلة؟
شمعى: اه فهمت قصدك
شمعى: تعرفى
شمعى: زى كلمة النصارى لما تتقال علينا
ياسمين: واحنا مش عرب اسرائيل احنا عرب كنا وما زلنا عايشين فى بيوتنا اللي احتلتها اسرائيل
ياسمين: قول عرب الداخل او عرب 48 او اي تعبير اخر
شمعى: بس اول مرة اعرف انه تعبير مش حلو انا كنت باخده بحسن نية
ياسمين: لا مش مهم
ياسمين: بس عشان تعرف يعني
شمعى: كنت فاكر انه مجرد تمييز
ياسمين: في ناس بتتقبله انا لا
شمعى: منا بقولك زى تعبير النصارى
ياسمين: انت بتتقبله؟
ياسمين: انا بدي منك ترجع لاول بوستات عندي فيها انا بوضح كثير نقاط عنا مخفية وكثير عرب ما بيعرفوها
ياسمين: لسه معايا؟
شمعى: اه
ياسمين: ممكن تقرا كلامي في السياسة وتقول رايك
شمعى: ناديت زوجتى تقرا الحوار
شمعى: حاضر
ياسمين: اه
ياسمين: اهلا بك وبها
شمعى: كنتى بتسالى ان كنت بقبل تعبير نصارى
ياسمين: اه
شمعى: لا طبعا مش بقبله
ياسمين: شفت
شمعى: لان ان اللى بيقوله بيكون يقصد معنى غريب
ياسمين: طبعا بيقصد التمييز
شمعى: بيقصد التمييز طبعا
ياسمين: مش على اساس الانسانية
شمعى: الانسانية فى مصر بتختفى بالتدريج
شمعى: وهيحل محلها الفكر الوهابى
ياسمين: هذا الخوف
شمعى: اسالك سؤال
ياسمين: اتفضل
شمعى: مين احق بانه يوصف بالخاين
شمعى: الاقباط بحجة انهم بيحبوا امريكا رغم انهم ما قالوش لامريكا تعالى مصر دى بيتك ومطرحك
شمعى: ولا اللى جابوا الفكر الوهابى والاموال النفطيه وغرقوا البلد وودوها فى داهية
ياسمين: طبعا اللي بيجيب افكار عنصرية ومعقدة
شمعى: ومع ذلك مش من حق اى قبطى يحكم مصر لانه خاين فى نظر الكثيرين
ياسمين: انا بدي اقولك على شي
شمعى: معاكى
ياسمين: احنا عندنا ناس مثقفة كثير وواعية للي بيصير لان احنا على المحك ولانا عايشين بدولة لازم نكون صاحيين لانها كل يوم بتحاول تكسرنا فيه
ياسمين: فبتلاقي الناس فاهمة
ياسمين: يعني مش كثير بيتاثروا بهاي الحركات

شمعى: الكلام ده للاسف بقيت بسمعه من ناس مش من الاخوان يعنى المواطن العادى متأثر بالفكر ده
ياسمين: احنا تقريبا ما عندنا غطاء الوجه
ياسمين: يعني تلاقي اللي بتغطي وجهها هي المختلفة اما بالنسبة للمواطن العادي
ياسمين: فمشكلته انه عاوز يعيش
ياسمين: ومش داري بالدنيا
شمعى: انتى مع فتح؟
ياسمين: ولا مع حد
ياسمين: انا مع الفكر الحر
ياسمين: اصلا انا ما الي صوت عندهم

شمعى: اسرائيل وفلسطين الاولى بتساندها امريكا والتانية بيساندها العرب تفتكرى مين اوفر حظا
ياسمين: مش المهم مين الاوفر حظا المهم مين الاذكى
ياسمين: عشان ياخذ اكثر
شمعى: وهل ده نموذج يعبر عن قدرة العرب فى مسانده قضية ما
شمعى: انا باقصد ان العرب هم سبب الازمة
شمعى: مساندتهم لفلسطين سبب نكبتها
ياسمين: ههههههههه
ياسمين: اكيد
شمعى: من الحب ما قتل
ياسمين: انت فاكر هم بيساندوها بجد
ياسمين: هايدا حكي
ياسمين: زي الاغنية
ياسمين:
:)
شمعى: طبعا بيساندوها هم بيقولوا كده فى نشرة تسعة عندنا فى مصر
ياسمين: يا حرام

شمعى:

:)
شمعى: وادى النتيجة

ياسمين: انا ححكيلك شي صار معي فى بوست
شمعى: ها
ياسمين: لما كتبت بوست اسمه ما بين شيكاجو وتل ابيب
ياسمين: حول رواية شيكاجو كان فيه اضطهاد لواحد قبطي لو كنت قريت الرواية
ياسمين: فانا والله
ياسمين: كنت حكتب انه مشابه لتعامل اسرائيل مع الخريجين العرب
ياسمين: بس واحد مدون صديق سالته عن الموضوع هل فعلا اللي في الرواية مظبوط فهو قال لي لأ
ياسمين: فانا خفت اكتب اطلع غلطانة واظلم حد
ياسمين: لاني فعلا معرفش عنكم كثير
ياسمين: ايه رايك
شمعى: تعرفى انا من زمان وانا بشبه اللى بيحصل للاقباط فى مصر باللى بيحصل للفلسطينيين على ايد اسرائيل
ياسمين: واحنا عندنا بيحصل تقريبا نفس الموقف لمجرد الانتماء العرقي
ياسمين: ما احنا لازم نشتغل عندهم مفيش حل ثاني
شمعى: تقصدى عرب 48 بس ولا كل الفلسطينين
ياسمين: لا بس 48
ياسمين: انا في الاغلب بحكي عنا
شمعى: يعنى انتى معايا فى التشبيه بين اللى بيحص للاقباط فى مصر واللى بيحصل ليكم فى اسرائيل
ياسمين: اه
ياسمين: ما انا قلت لك من الاول اني كنت مقتنعة لما قريت الرواية
ياسمين: بس ما كتبت في البوست لاني ما كنت اعرف اذا حقيقة ولا خيال الكاتب
شمعى: بيحصل طبعا كتير فى مصر
شمعى: وخصوصا فى مناصب التععين فى الجامعة
شمعى: يعنى الطالب يطلع الاول ويرفضوا تعيينه معيد لانه مسيحى
ياسمين: اه تعال شوف عندنا
ياسمين: احنا عذاب عشان تاخذ الوظيفة اللي تستاهلها من ناحية علم ومعرفة وشهادة
شمعى: ومناصب كتير فى مصر بقت ممنوعة علينا
شمعى: طبعا ساعة الجد او فى وسائل الايضاح قصدى الاعلام بيتقال اننا مش بنفرق بين مسلم ولا مسيحى احنا بنختار حسب الكفاءة
ياسمين: طبعا كمان اسرائيل بتقول هيك
شمعى: طب انتى فى النهاية اسمك مضهدة من اسرائيل يعنى من عدو واضح لكن انا مين عدوى
ياسمين: مش عارفة مين عدوك
ياسمين: وطنك
ياسمين: ولا الناس
ياسمين: ولا الزمن

ياسمين: الحمد لله عرفت اصلا كل هدف المدونة كان ان الناس تعرف علينا اكثر
شمعى: انشاءالله
ياسمين: اول بوست كتبته وبحبه جدا يا ريت تقراه أتعلم من نحن؟؟
شمعى: حاضر
ياسمين: عشان انا بيهمني اكثر وضعي انا وشعبي
شمعى: انا هانشر الحوار ده على مدونتى عندك مانع؟ لو قلتى ذيع هنذيع
ياسمين: لا ما عندي مانع
ياسمين: طيب سؤال
شمعى: اتفضلى
ياسمين: ليه بدك تنشر الحوار؟
شمعى: لاننا قلنا راينا المشترك
شمعى: انتى كعرب 48 وانا كقبطى
ياسمين: فهمتك عشان احنا الاتنين من منطق واحد ومن اضطهاد متشابه
شمعى: بالظبط

ده حوار حقيقى مع ياسمين صاحبة مدونة كلمات من داخل 48

أسألة وأجوبة عن الإسكندرية

السؤال الأول

من بنى الإسكندرية؟

الإجابة

الإسكندر الأكبر

السؤال الثانى

ومن هدمها؟

الإجابة

عادل لبيب

أوقاتى بتحلو

أثناء تجولى بين قنوات الوصلة لعنها الله _ أو قطعها

وجدت أمامى الفنان العبقرى سيد مكاوى على عوده

يغنى إحدى أغانيه التى لحنها للمطربة الرائعة ورده

قاومت رغبة الجالسين فى استمرار التجول

والتنقل بلا هدف بين القنوات

كنت متحيزاً لفكرة أن من حق العملة الجيدة

أن تطرد ولو لمرة واحدة العملة الرديئة

ملحوظة
عنوان البوست هو أغنية ورده المقصودة

يا صديقتى لست أدرى

يا صديقتى لست أدرى

لما الأحزان دائماً تسود

لما نحلق بالحلم بعيداً

وبالحزن دائماً نعود

لما تبقى أفراحنا حيرى

مابين قضبانٍ وقيود

لما لا تعطينا الحياة

سوى الأوهام

وزيف الوعود

يا صديقتى

أملك ألف سؤالٍ

فهل تملكين الردود

كونى صديقة

كونى صديقة

كى أستطيع أن أجعل وهم الحياة حقيقة

كونى صديقة

كى أستطيع أن أحب الحياة بألف طريقة

كونى صديقة

كى تصبح كل الأشياء فى عينى رقيقة

كونى صديقة

كى يغرب وجه الخريف من كل الخليقة

كونى صديقة

كى يأتى الربيع فأرى كل الوجود حديقة

حبة ميه فى وشـــــــك رُش

حبة ميه فى وشــــــــــــــك رُش

واخرج كده للنـــــــــور م العش

هش وبش بأجمــــــــــــــل وش

واعلى بصــــــــــوتك مايهمكش

. . .

إطبع فــــــــــوق الارض آثارك

واكتب فى الأوراق أفــــــــكارك

واخرج بقى من قمـــــــــقم دارك

شوف مقــــــــــدارك زاد أو كش

. . .

لو جواك بركــــــــــــــان مكتوم

فجّر وامـــــــــــــــلا الدنيا غيوم

إزأر وإجــــــــــــــأر ياللا وزوم

مش مستاهلة تخـــــــــاف وتكش

. . .

لو جواك أحــــــــــــلام مكسورة

أو مش لاقى مكـــان فى الصورة

خدها نصيــــــــــحة مش فزروة

إرمى الكاميرا وماتصـــــــــورش

أعياد سعيده

أعياد سعيده

الكريسماس

كل سنة وانتم طيبين

عيد الأضحى

كل سنة وانتم طيبين

2007

كل سنة وانتم طيبين

عيد الميلاد

كل سنة وانتم طيبين

Chinese New Year

كل سنة وانتم طيبين

(year begins on 2/18/2007)

Honica

كل سنة وانتم طيبين

أعياد كتيرة مع إن

على رأى صلاح جاهين

مش كل البشر

فرحانين