Friday, February 22, 2013

لكن التاريخ بيقول

طول تاريخ مصر كان دايما المصريين ليهم نفس الهيئة والشكل والسلوك المناسب لعصرهم
مهما اختلفت أديانهم او تعددت بيفضل لكل المصريين شكل واحد
وبطول التاريخ نفسه كان دايما فيه ناس تانية فى مصر شكلها وسلوكها مميز ومختلف عن المصريين ولانهم مختلفين فمحدش منهم فضل فى مصر إلا اللى داب فيها واخد شكلها مع وجود هامش مسموح من التأثير المتبادل يعنى ممكن يسيب بصمة لكن بدون ما يلغى الهوية المصرية وفعلا محدش نجح انه يلغيها من أول اليهود اللى عاشوا فى مصر ايام الفراعنة مرورا بالهكسوس ثم الرومان ثم المماليك ثم العثمانيين ثم الفرنسيين ثم الانجليز
فكروا كده مين استمر بشكله المميز المختلف
ولا حد
اللى استمر داب فيها زى العرب زمان أو بعض الجاليات الأحدث
ودلوقت بدأ ناس مع إنهم مصريين إلا إنهم عايزين يعيشوا بشكل مميز ومختلف وعايزين مصر كلها تبقى شبههم عايزين ياخدوا مصر فى حتة مش شبهها
لكن التاريخ بيقول بشكل واضح إن اللى حاولوا يغيروا هوية مصر ماستمروش
واللى بيحاولوا يغيروها دلوقت مش هايقدروا
ده حكم التاريخ مش حكمى
مصر تدوب الحجر وماتدوبش

شمعى اسعد