Wednesday, January 23, 2013

أمير

فاكر يا امير اول يوم ليك فى المدرسة
فاكر لما رجعت البيت يومها قابلتك ازاى
عملتك فرح وانت داخل ومبقتش مصدق ان امير كبر ودخل المدرسة
طب فاكر النكتة اللى كنت بتحب تقولها وانت عندك تلات سنين بتاعة وعنده كمااان
طب فاكر جبتلك العسل يا ماما
طب فاكر بابا؟
فاكر انت كنت متعلق بيه قد ايه
طب فاكر لما كنت بتحب تنام جنبى وانا كنت بتضايق عشان انت بترفس؟
وكنت استنى لما تنام وانقلك وانت تقوم من النوم زعلان لما تلاقى نفسك مش جنبى
تصدق يا امير انا لسة عارف من يومين من ماما انك لما كنت فى ابتدائى اتخانقت مع السواق اللى بيوديك ويجيبك المدرسة وسبته وركبت تاكسى لوحدك وجابك لحد البيت، تصور اتخضيت اول ما عرفت (مع انها قدمت خلاص) وقلت ازاى رجع لوحده
طب تعرف ان اول جهاز كمبيوتر جبتهولك كان فى ذكرى وفاة بابا عشان يبقى كأن هو اللى جابهولك
طب فاكر موقع
Dark Future
  اللى كنت مدمنه وانت فى ثانوية عامة وكنت بتلعب عليه اكتر ما بتذاكر وكنت اتخانق معاك ومهانش عليا اعمل بلوك للموقع من الراوتر وقلت اسيبك انت اللى تاخد قرار انك تبطله
طب فاكر لما جاتلك علوم الفيوم وعرفنا انك ممكن تعمل طلب تحويل عن طريق النت وفضلنا متابعين الموقع لانه كان بالأسبقية وكنا خايفين ما نلحقش
فاكر بقى يوم ما الموقع ده بعتلك رسالة ان تم قبول تحويلك لعلوم الاسكندرية
فاكر احتفلنا بالخبر ده ازاى
يومها فرحنا انك اتعفيت من تجربة السفر والعيشة متغرب فى الفيوم
طب فاكر لما اتعفيت من الجيش؟
طب فاكر اول مظاهرة
فاكر يوم جمعة الغضب لما فضلنا طول اليوم لحد بعد نص الليل مش عارفين انت فين وماكانش فيه موبايلات يومها شغالة ونزلنا ندور عليك وفين وفين انت رجعت وقلت لنا انك كنت فى اعتصام محطة الرمل ومن التعب نمت هناك
طب فاكر لما ماما قفلت الباب بالمفتاح عشان ماتنزلش فى مظاهرة وانت هددت انك هاتنط من البلكونة
كل بيت فيه ثائر ومفتاح وبلكونة
هم ولاد الكلب اللى حابسينك شايفينك ازاى خطر عليهم طب بالذمة دى ناس بتفهم؟
هم ليه اتعموا ومش شايفين براءتك ونقاءك كل ده عشان انت ليك قناعاتك الخاصة
انت اتعفيت من الفيوم والجيش طب بالنسبة للسجن ايه؟
السنين جريت بسرعة
وفجأة كده بقى ليك بانر مكتوب عليه الحرية لأمير
امير . . انت كبرت امتى؟

http://www.albedaiah.com/node/16802


 

5 comments:

محمد قنديل said...

بكره يخرج بالسلامة إن شاء الله

ريوبى said...

موضوع ممتاز
ryobi

Umzug said...

بسم الله الرحمن الرحيم .. لا اله الا الله
Umzug - Umzug wien

Wohnungsräumung said...

شكرا على الموضوع المتميز
Dank Thema Wohnungsräumung

منتدى ماكينات said...

منتدى ماكينات