صحوة 27 نوفمبر 2012

اليوم من اوله مختلف ومميز

وانا نازل فادى وكرمة ام اربع سنين سألونى رايح فين قلتلهم نازل المظاهرات راحت كرمة واقفالى ع الباب ومش عايزانى انزل وبتقولى ماتنزلش عشان خايفة عليك
مع انها ايام ثورة يناير (كان عندها سنتين) كنت لما انزل وقتها وتسألنى رايح فين واقولها نازل الثورة كانت تقوللى هاتلى مصاصة معاك وانت جاى بس كبرت وفهمت وعرفت تخاف وتقلق
ركبت الميكروباص للمنشية وفى السكة لقيت السواق بيسأل الركاب أسئلة فى المعلومات العامة عن الاسكندرية زى فين سينما كليوباترا ولما غلب حمار الجميع قال ان سينما كليوباترا فى الفراهدة فى اللبان وبعدها فوجئت بنفس السواق بيقول لنا احنا الركاب ان مصر مش هاينصلح حالها غير لو حكمتها واحدة ست وهنا رديت عليه وقلت له انا موافقك لقيته التفتلى هو باندهاش وقاللى انت معايا بجد قلت له طبعا لاننا لو وصلنا لمرحلة اننا ننتخب واحدة ست وتفوز فعلا معناها اننا نضفنا وعدينا مراحل كتيرة جدا لقيته بيقوللى الله يرضى عليك قلت له بصراحة انت اللى مختلف ومتميز
نزلت المنشية اللى كانت مكان تجمع المسيرة الأولى ووصلت للحقانية على الساعة اربعة تقريباً، وهناك فوجئت بأعداد كبيرة اكتر كتير من توقعاتى. لأن عدم وجود الاخوان كان بيفرق معانا فى مظاهرات زمان باعتبارهم اقوى فى الحشد وبحسب المنطق اللى ساد لفترة طويلة هو اننا نسيب النظام الجديد ياخد فرصته. غير أنى لقيت معانا ناس اول مرة تنزل مظاهرات وشوش مختلفة عن اللى متعودين عليهم زى اللى بنقول عليهم حزب كنبة وشباب متوقعتش اشوفه النهارده.
اتحركنا فى مسيرة طويلة لحد سيدى جابر وطول المسيرة الاعداد كانت بتزيد والناس فى البلكونات بتحيينا وكان رد فعل اصحاب المحلات على غير العادة فيه احساس كبير بالفرحة والترحيب . .
وشوية وجه معاد صلاة المغرب فوقفت المسيرة للصلاة (كفرة وعلمانيين بقى) وبعدين كملنا رحلتنا وطول الطريق كانت الهتافات هى هى من ايام مبارك عيش حرية عدالة اجتماعية، كل شىء كان شبه المسيرات اللى ايام مبارك، كأنك بالظبط رجعت بعقارب الساعة لورا سنتين، حتى نفس الروح ونفس الكثافة فى المظاهرات، ونفس الناس فى البلكونات، وقلت اكيد لما اروح هاتفتح التلفزيون الاقى عمر سليمان والراجل اللى وراه بيعلنوا قرار التنحى
وبرغم ان المسيرة كانت كبير زى ايام مبارك قبل التنحى بالنسبة للمسيرة اللى اتحركت من المنشية لكن اتصلت باصدقاء فى المسيرة التانية اللى اتحركت من فكتوريا وعرفت منهم انها مسيرة كبيرة زى ايام مبارك قبل التنحى برضه واتقابلت المسيرتين فى سيدى جابر
طبعا اهم فرق بين مظاهرات النهارده 27 نوفمبر ومظاهرات 25 يناير ان فى يناير كنا احنا المتظاهرين ومعانا الاخوان ضد الفلول لكن النهارده احنا برضه المتظاهرين ومعانا الفلول ضد الاخوان يعنى فى الحالتين احنا ثابتين وهم بيتبادلوا الادوار وفى الحالتين احنا مع الناس ومع المطالب النقية للثورة من البداية والف اهلا باللى ينضم لمعسكرنا ولمسيرتنا
فى الحالتين احنا ضد الاستبداد، اللى اتغير هو مصدر الاستبداد وبالتالى اختلفت مواقع فئات معينة فى كل مرة، فى يناير 2011 كان مبارك والفلول هم مصدر الاستبداد فكنا احنا والاخوان ضدهم اما فى نوفمبر 2012 فالاخوان وجماعة المرشد هم مصدر الاستبداد فطبيعى تتحول الدفة عليهم وطبيعى هنا ان يصبح لكل ثورة فلولها وفلول ثورة اليوم كان الاخوان
طبعا نزول الاخوان عند القائد ابراهيم رغم اعلانهم عدم النزول واحتكاك الالتراس بيهم او ربما بعض البلطجية مكنش له اى تأثير على مسيرتنا لان كل فريق كان له اماكن التجمع الخاصة به.
مصر صحيت تانى النهارده ونفضت التراب، واسكندرية النهارده كانت فى قمة الابداع والتألق
النهارده كنت فخور بالاسكندرية وبالاسكندرانية
وفى اخر اليوم وانا راجع ركبت جنب سيدة كبيرة محجبة مكنتش مشاركة فى المظاهرات لكن سألتنى عنها وقالت لى ربنا يحميكم وفضلت تشتكيلى طول السكة من مرسى وتقوللى انا كنت بزعق لولادى واقولهم ادوله فرصة لحد ما لقيتنا بنغرق وبنرجع لورا وبقينا اسوأ من ايام مبارك، وتقوللى انا كنت عايشة فى بيت والدى كان جيرانا جريك وطاليان واحنا المسلمين الوحيدين فى البيت وكانت علاقتنا ببعض قوية وحلوة وطول عمرنا عايشين مسلمين ومسيحيين مع بعض لحد ما هم فرقوا بينا بافكارهم اللى جابوهالنا من السعودية
النهارده اللى حصل معجزة
ثورة ضد تجار الدين
حد مصدق؟
معقولة الاجابة المرادى مصر؟
رجعت البيت فادى وكرمة اللى كانوا خايفين وانا نازل قابلونى بالاحضان وكرمة قالت لى بابا بحبك قلت لها عارفة بحبك قد ايه؟ قالت قد البحر؟ قلت لها لا قد المظاهرات بتاعة النهارده

شمعى اسعد

27 نوفمبر 
2012
سيدى جابر