Monday, December 17, 2007

كنت فاكرك بسمة هالـــّـه


كنت فاكرك بسمة هالـــّـه


تمسح الحزن القديم


كنت فاكرك شمس طالـــّـه


بعد طول أمطار وغيم


كنت فاكرك نجم عالى


جاى ينور ف الليالى


جاى يخلى القلب يفرح


والربيع ف عيونه يطرح


واللى فات اهو فات وولى


انتى نجم حقيقى ولا


انتى وهم ف حلم جالى


كنت فاكرك بيت صغير


كل ركن فيه منور


يلقى قلبى فيه براحه


ينسى حزنه وطول جراحه


يمشى جنبه يلقى ضلة


انتى بيت حقيقى ولا


انتى شئ غريب يحير


كنت فاكرك يا حبيبتى


غنوتى وشطى وسفينتى


والشوارع والمداين والبلاد


وابتسامة جات لقلبى ف الميعاد


انتى دنيا تانية هاللا


انتى دنيا حقيقى ولا


انتى وهم ف قلبى عشتى

18 comments:

Anonymous said...

حلوه قوى قوى الغنيوه دى
سهله وتدخل القلب بسرعه
فى الأول كنت فاكره الحاله خوف وقلق
وبتسألها ياترى انتى الانسانه الجميله دى بجد ولا أنا غلطان
لكن المفاجأه فى الآخر كانت لذيذه
انت محتار توصفها بإيه
جامده جدا بجد

Ahmed Al-Sabbagh said...

رائع

عام جديد سعيد عليك

وكل سنة وانت طيب

تحياتى

خالو احمد

شمعى أسعد said...

وينكى
--------
ميرسى يا وينكى

بس على فكرة

فهمك الاولانى هو اللى صح

:)



Ahmed Al-Sabbagh
-------------------

وانت طيب

يا خالو احمد

وعام سعيد علينا كلنا

وشوشني said...

حلوة اووووووووووووووووووووووووي

yasmina said...

كلامك جميل جدا فيه حالة من المشاعر الغريبة

بحب غالبا ارد على الشعر ببعض الكلمات

افتكرت انك بسمة تمسح اي الم
افتكرت انك شمس تحرق اي شجن

افتكرت انك نجم يضوي عتمة اي ليل

انت بسمة
ام شمس
ام نجم
بحياتي

انت يا حياتي
وهم بحلم في جميع اوقاتي

افتكرتك يا حبيبي

جزيرة وشط ترسو فيه كلماتي

انت عالم ثاني
انت وهم وجاني


اي كلام

Doaa Ebrahim Aaql said...

رائعة فعلا كلماتك

.
.

دُمت مُبدعاً

البِـئرُ والظمّأْ said...

طبعا انت عاف رايي
تسلم ايدك يا بشهندس





عموما انا جايه اعيد عليك و كدهوو
و كل سنه و انت طيب



زيزي

شمعى أسعد said...

وشوشني
---------

ميرسى اووووووووووووووووووووووووي


yasmina
----------

ياسمين الرائعة

كلامك مش اى كلام خالص

وشكرا على تقديرك لكلماتى


princess dodo
---------------

شكرا يا دعاء

واتمنى اكون عن حسن ظنك دائما





Meekness !!!


زيزي هانم

ايه الزيارة الحلوة دى

كل سنة وانتى طيبة

WhItE HeArT said...

رائعه فعلا وخصوصا

كنت فاكرك بيت صغير

كل ركن فيه منور

يلقى قلبى فيه براحه

ينسى حزنه وطول جراحه

يمشى جنبه يلقى ضلة

انتى بيت حقيقى ولا

انتى شئ غريب يحير


لكن فعلا الكلام رائع ودي اول زيارة ليا تمناها تكون زياره خفيفه ان مكنتش اوعدك اني هنط عندك كل شوية شكلي كده


تحياتي

WhItE HeArT said...

رائعه فعلا وخصوصا

كنت فاكرك بيت صغير

كل ركن فيه منور

يلقى قلبى فيه براحه

ينسى حزنه وطول جراحه

يمشى جنبه يلقى ضلة

انتى بيت حقيقى ولا

انتى شئ غريب يحير


لكن فعلا الكلام رائع ودي اول زيارة ليا تمناها تكون زياره خفيفه ان مكنتش اوعدك اني هنط عندك كل شوية شكلي كده


تحياتي

شمعى أسعد said...

WhItE HeArT
----------------

زيارتك عمرها ماتكون تقيلة

بالعكس المدونة بتنور اكتر

بكل زيارة جميلة زى زيارتك

اهلا بيك دائما

خلود صلاح said...

جميلة اوى يا بشمهندس

كل سنة وحضرتك بألف خير

:)

انكسارات .. احمد البوهى said...

سعدت بزيارة المدونة
واستمتعت بقرائة قصيدتك
ـــــــــ
لك تحياتى

همس الليل said...

اولا :جميل اوى التعبير الادبى بتاعك فى كلماتك
ثانيا بعتذر عن عدم دخولى لفتره طويله مدونتك
واللى اكيد فاتنى فيها كتير اوى
ثالثا:هالنى واذهلنى طريقه حكيك او شعورك كقبطى متضطهد فى مصر
بجد استغربت اوى موقفك من خلال الكلام رغم ثقافتك ورغم انك تعرف كويس اوىىىى
ان التصرفات اللى بتحصل خصوصا فى اسكندريه وبصفتنا عايشين فى مدينه واحده وانى بردو من اسكندريه
بستغرب اوى انك حاسس الاحساس دا
اللى اصلا السبب فيه صراعات من اجل احراز مواقف سياسيه
من جهه الاقباط فخلف التصرفات الاستفزازيه اللى انت عارفها واللى كان اساسها اشتعال الفتنه فى اسكندريه اول مره كان السبب الاقباط مثلا
يعنى بئا عشان تاخدوا موقف ما تشعلوا فتنه عشان امريكا تتحرك
وبتقول مصورين ان الاقباط خاينين
لما معونه مصر تتقطع على القبطى والمسلم
دا مش بيقى تصرف غبى
نفس الموضوع بالنسبه للتصرفات المتعصبه من المسلمين
اللى بتنشأ رد على استفزاز لمسرحيات ابسط ما يقال ان اللى عملينها بيستخفوا بلاسلام
يعنى كل اللى بيحصل مسيس للاسف
لا بيعبر عن موقف واحد قبطى ولا مسلم
دا بيعبر عن مدى الانهيار الاقتصادى والسياسى فى المجتمع بشقيه المسلم والمسيحى
انا بعترض على وصفك انك بقيت حاسس انك زى اللى عايش فى اسرائيل
هو انت بتشوف دبابات داخله تكسر بيتك
او بتمشى فى الشارع حد بيضرب عليك نار
او ابنك فى المدرسه او الحضانه بيترفد بسبب ديانته

ان كان هناك عنف بين الطرفين وتسخين من اطراف خارجيه
فمصر كلها تدفع الثمن
مسيحيين ومسلمين

كن على ثقه من ذلك
بتمنى لو مكناش شعب عواطفه غالبه عقله
كنا ساعتها ميزنا ان اللى بيحصل دا كله وراه مصالح ناس كبيره اهم شىء عندها البيزنس
واخر شىء تفكر فيه الدين لا مسيحيه ولا اسلاميه
.
.
بخصوص الوظائف اللى شرط فيها الديانه تكون مسلم

اقولك حاجه ومتزعلش

ايه رايك بئا ان معظم الشركات المحترمه اللى بتدفع مرتبات تاكل عيش هيا الشركات متعدده الجنسيات اللى بئا شرط فيها تعيين نسبه لا تقل عن 90% مسيحيين
وجاى تتكلم عن شركه الله اعلم اخرها 200 جنيه مرتب فى الشهر وزعلان
طيب ربنا بيحبك انك مش هتقبل فيها هههههههههه

لو بس بعدت تفكيرك عن الجانب المتعصب هتلاقى ان الشركات الكبيره بئا فيها مسحيين اكتر
والشركات المسلمه بردو مليانه مسحيين
انا نفسى اعرف كل واحد تقع فى ايده حاجه غريبه على ميل او موقع يجرى يمسك فيها
رغم ان الواقع جلى وواضح لا فى شغل لمسحيين ولا مسلمين

يا عم قول يا باسط ومتكلكعهاش اوى كدا
الحياه فى مصر بقت صعبه على اى انساااااان
مبقتش تنفع حتى الحيوانات
اسفه على طول تعليقى بس انا قلت اعلق بأثر رجعى

واتمنى تحس اننا كلنا اخوات طالما فى مسلمين لسه بيضحكوا فى وشك وجيرانى المسحيين بيعيدوا لينا وينزلوا لينا كحك عيدهم
يبقى صدق الواقع الى ادامك حتى لو شفت فئه شاذه

والمسيحيه محبه
والعنف غريب عليهم

والاسلام سلام
وعمره ما كان عنف

تحياتى ليك ولزوجتك وابنك

Abdelrahman Ellithy said...

دليل المدونات العربية
مدونة كل المدونين العرب .. جريدة كل العرب

انت مدعو للكتابة في مدونة كل العرب
مشروع الجريدة العربية
تكمن فكرة هذه المدونة في جمع اكبر قدر من المدونين العرب واقدرهم وافصلهم لكي يكتبو في مكان واحد
ذلك للحصول في النهاية على مدونة اشبه بالجريدة العربية تناقش القضا ياالعربية وخلافات العرب حيث ان كل الطوائف والبلاد مدعوة للكتابة
وقد تكون نقطة انطلاق للتفاهم والنقاش حول القضايا العربية المختلفة وتقابل وجهات النظر

للمشاركة ارسل ايميلك (بريدك الالكتروني) في تعليق على هذا المقال وسوف تتلقى دعوة للكتابة في هذه المدونة

مزايا الكتابة هنا :
للكاتب :
1- عدد اكبر من القراء
2- تحسين نتايج البحث لعناوين المقالات
3- انت كاتب وفي نفس الوقت قارئ تقرأ ما يكتبه كبار المدونين العرب
4- شهرة اكبر .. ودائما اقول ان في الاتحاد قوة وهذا هو اتحاد المدونين العرب

للقارئ :
1- القراءة للمدونين الكبار تحت صفحة واحدة
2- تجميع المدونات وجعلها مث ل جريدة الكترونية
3- سهولة الوصول للمقالات المرادة

شروط الكتابة (لن يتم التعديل لو مسح اي مقال ):
1- عدم الاساءة للاديان السماوية
2- عدم نشر مقال من اجل ربح المال او التنفع المادي ولكن الشروحات مقبولة ومرحب بها
3- عدم كتابة كلام خارج او الفاظ اباحية
4- الكتابة باللغة العربية

الفكرة تتلخص في ان كل مدون له حق الكتابة فقط بارسال ايميله في تعليق على هذه المدونة
اذا كانت لك مدونتك الخاصة فلا مانع من نسخ مقالاتك الهامة والتي تراها ترقى كي تكون في الجريدة العربية الالكترونية او مدونة كل العرب

وانا شخصيا ساكتب في مواضيع مختلفة وساهتم بتحقيق افضل نتائج للبحث والحصول على اكبر قدر من الزوار حتى تصل مقالاتك لاكبر عدد من القراء
كما ان تجمع المدونين سيجيئ بقراء اكثر وهكذا

برجاء ارسل لنا بريدك الالكتروني كي تستطيع الكتابة في هذه المدونة
ادعو الله ان تكون هذه المدونة ملفتة لنظر القراء ومحط انظار الراي العام العربي
مشروع الجريدة العربية الموحدة

كما يمكنكم اضافة مدونتكم في
دليل المدونات العربية
والله ولي التوفيق

حمامة said...

إن شاء الله تطلع حقيقة
وتبقى اجمل حقيقة

:)

مُزمُز said...

الله

بجد قصيدة جميلة أوي أوي

رقيقة ومحكمة وعميقة وبسيطة وحساسة جدا

لمستنيييييي بشدة
.............
انتى نجم حقيقى ولا
انتى وهم ف حلم جالى
.....
انتى بيت حقيقى ولا
انتى شئ غريب يحير
.....
انتى دنيا حقيقى ولا
انتى وهم ف قلبى عشتى
.....
أعتقد هي دي الخلاصة لأن هو ده السؤال المؤرق دايماااااا في أي شئ
.......

حضرتك ليه مش بتكتب من كتير؟
لعل المانع خير
اكتب حاجة جديدة تمتعنا وتدخل مدونتك السنة الجديدة

:)

aliaa abdalfatah said...

جميل اوي الشعر ده تسلم ايدك عليه
وممكن اقتبسه منك على دونتي لانه فعلا تحفة