Friday, November 16, 2007

وييجى الخريف



وييجى الخريف


ويزيد الحزن جوايا

كأنه محوش لقلبى

طول السنة أحزانه

وييجى الخريف

وتزيد الغربة جوايا

وقلبى يتوه فى أوطانه

واحس أوراق العمر

زى أوراق الخريف

تتشبث بالخيط الضعيف

وتصرخ بالصوت الحفيف

وتحلم بيوم الربيع

يلملمها فى أحضانه

وييجى الخريف

وارجع لأيام الطفولة

وسنين حياتى الأولى

لما كان القلب أخضر

لما كان العمر أخضر

لما كان حتى الخريف

بييجى أخضر

مهما كانت ألوانه

وف لحظة تشبه تمام

ليلة شتا

من كتر ما فيها أحلام

وأمانى ميتة

وقلبى فى عز حرمانه

افتكرتك معرفش ليه

لقيتك فى قلبى وحواليا

حسيت بقلبى

لسه فى مكانه

ولقيتنى بعد بعاد وغربة

باتمنى ألقى بين إيديكى صحبة

وينهى الحزن فيضانه

ولقيتنى فى عز اشتياقى للربيع

بالجأ إليكى

لأنك تمللى

ربيع سابق أوانه


خريف 94

12 comments:

سلوى said...

أول تعليق

هييييييييييييه

إيه الجمال ده

بجد كلمات رقيقه جدا

وأجمل حاجه إنك في النهايه
تجد الربيع

أتمنى لك كل سعاده وحياة ربيعيه
حضرتك ومدام صابرين طبعا

وأشكرك على زيارتك وأرجو أن تكون دائمه
خالص تحياااااتي

شمعى أسعد said...

بجد يا سلوى

انا اللى بشكرك على زياراتك

الدائمة لدكانتى المتواضعة دى

وعموما

التعليقات الجميلة المشجعة

كلها بتعملى جو ربيعى دائم

عين ضيقة said...

هتزعل منى لو قلتلك لسه ع الشعر الجيد شوية؟

وعموما
أنا هستنى

تحياتى

Anonymous said...

اكتشفت النهارده شاعر قوى ومتمكن
زيارتى الأولى ومش هاتبقى الأخيره لو سمحتلى
تحياتى

Anonymous said...

سيدي
في البداية أهلا بك
و اتمنى أن تهتم و تقرأ مداخلتي
انا مصرية سكندرية عندي لك دعوة لحضور ندوة في جمعية مصر للثقافة و الحوار
بعنوان
" مهارات الاتصال الفعال "
كنت أتمنى أن أجد لسيادتكم بريدا الكترونيا أو ما شابه و لكن لا يوجد
أعرفكم بنفسي
مها عمر من الاسكندرية
جمعية مصر ببثقافة و الحوار
www.tafaselena.blogspot.com
هذه مدونتي الخاصة
رسالني على
thakafa_hewar@yahoo.com

رحــــيـل said...

كلمات جميله جدا بجد
عارف انا بحب الخريف قوى رغم حزنه

وييجى الخريف
وارجع لأيام الطفولة
وسنين حياتى الأولى
لما كان القلب أخضر
لما كان العمر أخضر
لما كان حتى الخريف
بييجى أخضر

حلو احساسك قوى
خال تحيااااااااااااتى

شمعى أسعد said...

عين ضيقة
----------


اهو بنحاول يا ستى

ميرسى على اهتمامك



وينكى
--------

وينكى ازيك

شكرا على الاطراء الجميل

وشكرا على الزيارة

واتنمى متكونش الاخيرة فعلا

شمعى أسعد said...

Anonymous
------------

استاذة مها عمر

شكرا على الدعوة

وانشاءالله هاحضر



ra7eel
---------

ميرسى جدا يا راحيل

احسدك على حبك للخريف

:)

mesh2dra said...

مستر شمعي
بجد
كلمات رائعة
جداااا

بس متفكرنيش بقى
بالشتا ولا بالخريف
ياريت الدنيا تفضل على طول ربيع او حتى صيف

مجلة سيكولوجية مصرية said...

انت مخاصمنى ولا ايه

تحياتى

أحمد مصطفى

elFadyConsultant said...

الله ينور ...
جميلة قوي يا هندسة
بجد عجبتني قوي وأتمنى زيك
يرجع العمر أخضر

yasmina said...

يأتي الخريف
ويذكرني بما كان
يقوقعني بالاحزان

يقربني الى الشتاء
الى مطر وبكاء

يأتي الخريف
ينبه لخريف عمر آت
وربيع عمر ذاهب

ربيع قصير لا ادري هل مر
ام هو قادم
ربيع انتظرته حتى مل الصبر من صبري

اي كلام

اسفة اني مش متفائلة زيك
سلام