Tuesday, January 30, 2007

حبة ميه فى وشـــــــك رُش



حبة ميه فى وشــــــــــــــك رُش


واخرج كده للنـــــــــور م العش


هش وبش بأجمــــــــــــــل وش


واعلى بصــــــــــوتك مايهمكش

. . .


إطبع فــــــــــوق الارض آثارك


واكتب فى الأوراق أفــــــــكارك


واخرج بقى من قمـــــــــقم دارك


شوف مقــــــــــدارك زاد أو كش

. . .


لو جواك بركــــــــــــــان مكتوم


فجّر وامـــــــــــــــلا الدنيا غيوم


إزأر وإجــــــــــــــأر ياللا وزوم


مش مستاهلة تخـــــــــاف وتكش

. . .


لو جواك أحــــــــــــلام مكسورة


أو مش لاقى مكـــان فى الصورة


خدها نصيــــــــــحة مش فزروة


إرمى الكاميرا وماتصـــــــــورش

33 comments:

أسوور said...

شمعى

بجد .. بجد .. ايه الحلاوة دى

الوزن .. القافية .. الوقع الموسيقى على الأذن

انت بجد جميل .. زجل أكثر من رائع

شمعى أسعد said...

ياسمين
----
بعد ما كتبت البوست
وانا لسة يدوب
بعمل معاينة
لقيت تعليقك

بجد توقيته اسعدنى جدا

sara... said...

جميله الحاله مش كل الناس بتكتب وهى مبسوطه كده ورمياها ورا ضهرها

بسمه عبدالباسط said...

أيه الجمال ده بجد كلام جميل قوى ومعبر قوى
وفعلا بوست رائع

Azza Moghazy said...

قريت التدوينة تانى على مهل
فعلا انت زجال جميل لغتك طلقة ومش شبه حد قريته ابدا قبل كده مش عارفة معنى كده انك تجاوزت المرحلة التانية ولا لا مقدرش احكم لانى مش ناقدة بس كقارئة احب اشكرك فعلا على الزجل الجميل ده
بس مستنية اكتر
يا ريت شوية غزارة فى الانتاج بقى
سعيدة بالتعرف عليك وعلى مدونتك الجميلة ومعلش على سربعتى النهاردة عالماسنجر انت عارف بقى الصحافة ومتاعبها

Anonymous said...

W've always admired Sallah Jahin and Ahmad Foud Negm.But now We admire Sallah Jahin Ahmad Foud Negm and Shammie Assad.It is truly an excellent post.

مُزمُز said...

الله على انسيابية اللغة وتميزها

بجد جمييييل جدا جدا جدا

شمعى أسعد said...

sara
-----
فى الحقيقة يا سارة
الحالة دى مش بتيجى كتير
شكرا لزيارتك :)

bos bos
--- ---
ميرسى جدا يا بوس بوس

واحدة وخلاص
-----------
عزة
رأيك اسعدنى فعلا
لكنه حطنى فى مازق
اقصد تحدى حقيقى مع نفسى
بس المشكلة ان التحدى ده
بيخلينى اكتب قليل

لان اصطياد فكرة جديدة
مسألة مش سهلة ابدا ابدا


souzan & anis
------ & -----

انا فاهم اللى ورا كلامكم ده
انتوا هدفكم طبعا
تشهروا صلاح جاهين
واحمد فؤاد نجم على حسابى
ومن خلال مدونتى
صح :)

مزمز
-----
شهادة اعتز بيها جدا
منك يا معاذ

Anonymous said...

Hi, Mr.Shamei

أحلى حاجة فى اللى حضرتك كاتبه إنه جديد و بيوصل على طول
المهم ربنا يوفأك و حاول تكتر شوية عشان المعانى بجد قوية
و على فكرة مش أأل من صلاح جاهين

تــسنيـم said...

تحفة بجد يا شمعي.. كمية التفاؤل والإرادة اللي في كلماتك تحمس أي حد علشان يكون أحسن من اللي هوا فييه..
تحياتي.

سجين فى قلب الوطن said...

يا عم
الدنيا ساقعه
انت مش فى البلد دى و لا أيه ؟؟؟

على العموم كلامك جميل و موزون

عديت اطبع اثارى عندك فى المدونه

Amr Ahmed said...

رائعة بجد

انت شاعر هايل

انا افتكرت في الاول

عمنا جاهين

بس بجد رائع

smraa alnil said...

وانا بقراها بجد حسيت اني بغنيها
حسيت انها نشيد
كلام تحفة ورائع
يا ابني انت جامد
وانت عارف راي فيك من زمان
كلامك خلاني بجد ابتسم يا شمعي
واحس ان لسة في خير او يمكن يكون في خير احنا هنعملوا
طنش
دة اللي حسيته وانا بقرا كلامك
ان ابسط وسيلة للحياة انك تتطنش
ومش منتصور
ونرمي الكاميرا
هي فعلا مش مستاهلة
اننا نحزن ونكش
يااااااااه
والله كلامك عجبني موووووووووووت
خسارتك يا شمعوتي في البلد دي
الا صحيح هي اسكندرية ايه اخبارها اليويمن دول

الأباصيرى said...

أنا قلت مش ممكن صاحب المدونة اللى كاتبها
قولت أكيد صاح جاهين لان دة أسلوبة

بجد هايل ربنا يوفقك

تحياتى

بنت البلد said...

حلوة جداا الكلمات اخوى اسعد



ربنا يوفقك

شمعى أسعد said...

Anonymous
----------
علا
تلموذتى :)

انتى ليه داخلة انونيموس
عموما انا سعيد انك قريتى مدونتى
وسعيد ان فيها حاجة عجبتك

وميرسى على رأيك

شمعى أسعد said...

تسـنيم
--------

اشكرك يا تسنيم

رأيك هو اللى مشجع فعلا

سلمى على بورسعيد وناسها


سجين فى قلب الوطن
----------------

انا لما كتبتها
كانت الدنيا حر
:)

وعموما اثارك ثبتت فى البوست
كما تثبت فى الراحتين الاصابع
على رأى شاعر عربى قديم
:)

شمعى أسعد said...

عمرو احمد
----------
انا متشكر اوى يا عمرو
بس صلاح جاهين
دى واسعة اوى
:)
ايش جاب لجاب

شمعى أسعد said...

سمراء النيل
------------
انجى

ازيك
منورة المدونة

طالما عجبتك
يبقى انا عديت

كنت متشوق اعرف رأيك

اسكندرية فى انتظارك
مش قلتى هاتيجى لما تقبضى

قبضتى ولا لسة ؟؟؟


قوام بقى
عشان محضرلك عريس

شمعى أسعد said...

الأباصيرى
---------

شكرا يا اباصيرى

بس صلاح جاهين
برده
ما يوصلش للمستوى ده
ههههههههه

بنت البدو
---------

ميرسى على زيارتك
وميرسى جدا على رأيك

شوق الياسمين said...

لو جواك أحــــــــــــلام مكسورة

أو مش لاقى مكـــان فى الصورة

خدها نصيــــــــــحة مش فزروة

إرمى الكاميرا وماتصـــــــــورش

انا رأيى يجيب كاميرا جديدة

شمعى
مش بطاله :p

mariam said...

تصدق الكلام ده واقعى قوى
حقيقى تعبيرك حلو
بس احلى حاجه انه بيوضح اننا لازم نعمل حاجه
و نطلع اللى جوانا

حصان بري said...

ش الشعر و ك الملكيه و م المشكله و الهاء مربوطه لكن فيها الحل
قصيده متكامله ياشمعي
keep going

قصاقيص said...

لو جواك أحلام مكسورة
أو مش لاقي مكان في الصورة
خدها نصيحة مش فزورة
إرمي الكاميرا وماتصورش
بجــــــــــــد جميلة
معبرة أوى القصيدة ككل والجزء ده بالذات حسيته أوى
تحياتي

شمعى أسعد said...

شوق الياسمين
-----------

مش بطاله

ماشى مردودالك برده



mano
-----

شكرا لزيارتك الجميلة دى


حصان بري
---------

سعيد بزيارتك
بس مفهمتش الحروف دى معناها ايه


قصاقيص
-------

شكرا جدا لزيارتك
وعلى فكرة اشعارك هايلة فعلا
وحلو ان احنا الاتنين
قصاقيص زى بعض

ody911 said...

شمعى

جميلة أوى أوى بجد

وأحلى جزء

دة


لو جواك أحــــــــــــلام مكسورة

أو مش لاقى مكـــان فى الصورة

خدها نصيــــــــــحة مش فزروة

إرمى الكاميرا وماتصـــــــــورش


وعادى بقة
أودى

شمعى أسعد said...

ody911
-------
شكرا لزيارتك

انا حقيقى مبسوط انك بتقرالى

وعادى بقى

شمعى أسعد said...

سجين فى قلب الوطن
----------------

ارحب طبعا بهذا اللقاء

وشوشني said...

حلو اوي يا شمعي كلامك حلو وكمان انتى انت ملتزم بالقافيه وكل حاجه حلو اوي

Azza Moghazy said...

واضح ان مفيش اى استجابة لاراء وطلبات الجمهور فى المدونة دى
هى دى غزارة الانتاج يا استاذ شمعى
دنا طالباها بقالى قرن
يا ريت ترجع بسرعة
لو مكانش الطلب تقيل يعنى

Anonymous said...

heyz...
ezayak ya shm3e..??
hay awl mra bzor elmodwn....and frankly it's pirfect...
go on brother.....

ur sister Dallal

بينى و....وبينى said...

ايييييه يادين النبى .أيه الحلاوة دى.عظمة على عظمة.هههههههههه.لا بجد حلوة اوى.وبسيطة اوى

عـمـرو قـطامـش said...

احكام اللغه .... صدق التعبير .... سهولة الالفاظ ... و ضو ح الفكرة ... الموهبة الثقيلة... كلها شروط تفرض نفسها على تكوين الشاعر
و ما ارانى الا امام شاعر ثقيل او من الفحول كما يقولون
اعجبتنى فيك تلك النقاط و اتمنى لك ابداعا مستمرا و متميزا و حاول ان تشرف مدونتى المتواضعة بزيارة خفيفة علها تلقى اعجابكم و اسمح لى ان اضيفك عندى و السلام
عمرو قطامش