يا حكاية جميلة ليلاتى
بحكيها لحد الفجر
وبفكر فيكى بقالى
من عشرة حداشر شهر
وبجيب الورقة وقلمى
واكتب أشعار علشانك
وافرشلك ركن فى قلبى
واتمنى يكون ده مكانك
وبشوفك زى فراشة
بتطير حوالين الزهر
وبشوف الكون فى عيونك
شمساية ونسمة وبحر
دنا فاكر يوم ما عرفتك
بالصدفة سافرتى معايا
فى القطر قعدنا نحكى
وحكاية تجيب فى حكاية
من يومها وقلبى يقوللى
خلصت خلاص الصبر
وما دمت عرفت ميعادها
ومكانها فى قطر العصر
هيسافر قلبى معاكى
مطرح ما تروحى يروح
وبشوفك معنى وغاية
وكلام بيرد الروح
والقلب أمرنى بحبك
ولقيتنى بطيع الأمر
أنزل من بيتنا بسرعة
استنى ميعاد القطر
نشرت فى جريدة القاهرة بتاريخ
28 Feb. 2001
ونشرت فى جريدة القاهرة مرة أخرى بتاريخ
31 July 2001
