مُخترقٌ قلبي كطهران

 مُخترقٌ قلبي كطهران

وسمائي كسماءِ إيران

والحزنُ يصولُ بلا ردعٍ

ويواصلُ قذفَ النيران

منفردًا بقرارِ الحرب

بجنونٍ كجنونِ ترامب

الحزنُ يعربدُ في القلب

كحزبِ اللهِ في لبنان

...

شمعي أسعد 

#تأملات_على_الصحراوي

شوفت حفل الافتتاح؟

 

شوفت حفل الافتتاح؟

كنت مستني بحنين 

ينقلك حبة سنين 

تبني بإيديك الهرم

يمنحك حبة براح

قبل حلمك مانهزم

كنت مستني الشاشات

ترضي شوقك للخلاص

تلقى فيها عرض خاص

عن حياتك

ذكرياتك

كل شيء ف العمر فاتك

تحيي فيك حلم مات

شوفت حفل الافتتاح

كنت مستني المفاجأة

يرجع العمر اللي راح

والنتيجة غير مطابقة

...

شمعي أسعد 

#تأملات_على_الصحراوي

كل ماسمع ف الأغاني

 أنا ليه بخاف

كل ماسمع ف الأغاني 

أي كلمة "اغتراب"

أي كلمة عن فراق

بين حبايب 

أو صحاب

أي معنى فيه رحيل

أو وداع

أو كلام عن حد غاب

أي غنوة عن دموع

 عن قلوب

جرحها قالب عذاب

أو بخاف

من أغاني 

فيها أحلام باللقا

واللقا صعب المنال

عن قلوب متشوقة 

شوقها فاق الاحتمال

أو بخاف م الأغاني 

اللي عن بكرة البعيد

واللي بيزيد خوفي منه

كل ما الأحلام تزيد

خوفي إن العمري يجري

تطلع الأحلام سراب

شمعي أسعد

#تأملات_على_الصحراوي

خايب في عد الصحاب

 وعامللي شاطر ف الحساب

وانت خايب حتى في عد الصحاب

افتح الكراس وراجع

كام صديق 

سابوا فيك

جرح ومواجع

كام صديق ف العمر ساب

وكل مرة

تقول دي مرة

وبعدها تبدأ جديد

كشف أحزانك يزيد

كل يوم أحزان إضافي

وكام محاولة للتعافي 

وكام محاولة للعتاب

فترجع وتحسب

وتقسم وتضرب

وتطرح وتجمع

وتخصم ما يوجع

تكتشف كام غلطة عدوا

وانت برضو

لسة خايب ف الحساب

شمعي أسعد 

#تأملات_على_الصحراوي

لن اتحدث عن منال نجيب

في جريمة قتل منال نجيب لن اتحدث عن منال نجيب التي لا أعرفها.. لكن سأتحدث عن شركاء الجريمة الذين تعرفونهم جميعا.

ليست صعوبة الطلاق هي سبب الجريمة فالزوجة لم تطلب الطلاق وحين طلبته قتلها.

الطلاق موجود في المسيحية لكنه يشبه الخلع في الإسلام أي يحتاج إلى إجراءات وشروط كانت معقدة لكنها أصبحت أقل تعقيدا الآن.

أهم الشروط هو شرط "استحالة العشرة" وفي حالة منال كان هذا الشرط متوفرا، فالزوج يهدد زوجته بالقتل ويفتح الغاز على أبنائه في محاولة لقتلهم.

لكن منال لم تطلب الطلاق لأنها خافت من "كلام الناس".. خافت من مجتمع ضاغط بيعاير المطلقة ويطاردها.. وهي كأم "عندها بنات" خافت من الوصم أكثر من خوفها من مجرم تعيش معه.. المجتمع هنا شريك أول في الجريمة.

منال ذهبت لرجل الدين تشكو له زوجها وتحكي مشكلتها.. وبحسب ابنتها من ذهبت إليهم أقنعوها بالصبر والاحتمال.. أعرف رجال دين يتوسطون بإخلاص وتفاني لحل هذه المشاكل، لكن من قال لمنال "هدي سرك وتعايشي" هو شريك ثان في الجريمة.

أما الفاعل الرئيسي في الجريمة فليس هو القاتل نفسه.. بل هذا الشعور الغريب بالاستحقاق عند أغلب الذكور الشرقيين..

الذكر الشرقي يظن إنه السيد و"تاج راس الست"، ويعامل زوجته كجارية عليها أن تطيعه، حتى لو كانت هي من تعمل وتدبر المال، لن يشفع لها هذا، فهي في عقله الباطن مجرد وسيلة لإشباع الرغبة، وربما يحتقرها في قرارة نفسه، حتى في أكثر اللحظات الحميمة.

هذا الذكر سيتحول إلى دجاجة صغيرة في اول كمين شرطة، فهو أيضا يعرف حجمه الحقيقي، لكنه كذكر "مستحق" لا يفهم أن يظل مقهورا طوال الوقت، ويعرف أن اهل بيته هم الحلقة الأضعف في دورة حياته اليومية، فيعيد تدوير القهر، ويتحول في منزله إلى الصورة التي يرى فيها نفسه السيد، شاهرا عضوه الذكري كسلاح وحيد يملكه حتى أنه أنجب اربعة أبناء من زوجة لا يحبها ولا تريده.

شعور المرأة بالضعف أمام الرجل هو أيضا شريك خفي.. أفهم أن تكتشف زوجة طباع زوجها السيئة بعد الزواج.. لكن لا أفهم كيف تنجب منه أربعة أبناء.. هذا الاستسلام غير المفهوم حاضرا بشكل ما في هذه القصة.

وعودة للمجتمع.. المتهم الأول.. فلا حل له سوا أن تتغير المرأة نفسها..

أعرف سيدة منفصلة عن زوجها بعدما سعت هي وليس هو للطلاق، لاستحالة العشرة، وبعد أن نالت حريتها ظلت لسنين طويلة يتملكها شعور بالذنب أمام أبنائها، خوفا أن يسبب وضعهم الجديد حرجا أمام زملائهم، كبر الأبناء وجاءت الفرصة لتختبر هذا الشعور لديهم فتفاجئت برد ابنها أن هذه الأمور تحدث ولا تخلو بيوت أصحابه من مشاكل مختلفة سواء كانت طلاق أو وفاة أحد الوالدين أو مشاكل أخرى.. كان رد ابنها هو لحظة الإفاقة الحقيقية التي نالتها منذ انفصالها.. وبعدما تحررت بالطلاق.. حررتها كلمة ابنها من الآثار النفسية للطلاق نفسه، وأصبحت قدرتها على مواجهة المجتمع أقوى ولم تعد تخاف المجتمع ولا الوصم.

وأعرف سيدة أخرى بعد الانفصال اجتهدت في تطوير نفسها، واهتمت بالنجاح المهني حتى أصبحت ضيفة في القنوات التلفزيونية في تخصصها، فصارت نموذجا ولم يشغلها المجتمع ولا نظرته لها.

وأعرف أخرى تكافح لتعليم ابنتها تعليما راقيا رغم ضيق ذات اليد، ليكون تعليم ابنتها هو نقطة التوازن في حياتها، رغم وجودها وسط مجتمع شعبي لا يرحم لكنها لا تبالي.

وأعرف سيدات كثيرات منفصلات وناجحات وهن من سيجبرن المجتمع على تغيير نظرته، وربما ينقذ هذا ضحايا محتملات.

شمعي أسعد 

#تأملات_على_الصحراوي

#حق_ماما_منال_لازم_يرجع

مولد يا دنيا

على قناة cbc من شوية كان شغال فيلم مولد يا دنيا.. اللي كتبه يوسف السباعي وأخرجه حسين كمال.. واتعرض أول مرة سنة ١٩٧٦.. الفيلم الاستعراضي الجميل اللي يساعدك وانت بتتفرج على تنظيم ضربات قلبك وتحسين التنفس وظبط حالتك النفسية.. الفيلم بيحكي قصة مجموعة من المشردين جواهم فنانين مدفونين بيقابلهم مدرب رقص بيكتشف موهبتهم ويعمل بيهم فرقة فنون شعبية.

الفيلم كان مقصود منه يكون استعراضي.. عشان كده أغلب أبطاله غنوا وشاركوا في كل أغانيه.. حاجة محصلتش كتير في السينما المصرية.

ورغم بساطة القصة نفسها.. لكن بتشوف إزاى الفن قدر يحول شباب متشرد لفنانين.. وإزاي طلّع أجمل ما فيهم.

وبتشوف نفسك كأنك بتتحول معاهم.. وبتبارك تحولهم وبتحب نسختهم الأخيرة..

الفيلم طول الوقت بيبعتلك من خلال أغانيه رسايل إيجابية وعايز ينشلك من تشردك أو شرودك..

فتلاقي أغنية تعالى جنبي اللي كتبها عبدالرحيم منصور ولحنها بليغ حمدي.. كأن الدنيا بتقولك سيب وجعك وهمومك:

 

"ماتيجي جنبي 

هتشوف بعينيك

جنة حواليك

الناس هنا حلوين

عايشين على السماح

ألوانهم الجميلة 

مفيهاش لون الجراح

حاسين بالدفا

عايشين ع الوفا"

بس إنت بتقاوم البهجة وبتقاوح أو خايف ف لسان حالك يرد:

"وفا إيه 

ده الشقا مش راضي بينا

إحنا اللى رضينا بيه"

لكن رغم الخوف إننا نصدق مش هنبطل:

 

"نحلم ببكرة يجينا"..

وبكلمات مرسي جميل عزيز وألحان منير مراد تدلعك الدنيا أكتر..

"أأمر يا أمير واطلب يا أمير تلقى المطلوب جايلك بيطير"

وانت لسة بتقاوح ورافض تصدق

فمرسي جميل عزيز ومحمد الموجي هايشاركوا في المحايلة

"يهديك

يرضيك

الله يخليك"

وانت بتبرر تخوفك:

"طول عمري بهرب من عمري 

وبسلم للأيام أمري

وتاخدني الريح 

وتجيبني الريح

وأيامي بتجري"

عشان جراحك أقوى وذكرياتك أليمة

ومرسي جميل عزيز وكمال الطويل داسولك على كل أوجاعك:

"يرحم زمان وليالي زمان

والناس يا متهني يا فرحان

الدنيا كانت وردة وشمعة

ولسه ما اخترعوش أحزان"

بتراجع نفسك وتطمن نفسك انك مش كده.. وإن حالك كان أحسن:

"صدقني يا صاحبي

كان الزمان صاحبي"

لكن تقلبات الحياة وعنف الموج لما يقلبك:

"آه يا زمان العبر

سوق الحلاوة جبر

إحنا اللي كانوا الحبايب

بيسافروا بينا القمر

بقينا أنتيكا"

وبعد التوهة والحيرة لا نملك في عز ضعفنا وانكسارنا غير إننا نبص للسما ونطلب العون:

"يا قوي يارب

يا كريم يا عظيم يا رحيم يا قوي 

من حر حرقتي ومر دنيتي وضعف قوتي

بنده عليك قوي يارب"

من خلال أغنية في الفيلم تشبه الصلاة كتبها مرسي جميل عزيز ولحنها محمد الموجي.. كان لا بد منها قبل إعلان التغيير النهائي.

وبعد ما خدنا قرار التغيير واستعنا بربنا.. ييجي الاستعراض الأخير في الفيلم.. وبنفوز كلنا بالنتيجة.. ونردد كلمات سيد مرسي وألحان بليغ حمدي:

"يالا يا دنيا نقول للدنيا 

كنا إزاي عايشين في الدنيا

 وليه ضيعنا الوقت ده كله..

واللي ما شافش الدنيا نقوله آهي دي الدنيا"

مع إصرار على التحفيز في تكرار كلمة "يالا".. لأننا خلاص:

"اشتاقنا وهديت أشواقنا خلينا الدنيا تصدقنا"

واكتشفنا إن إرادتنا كانت هي سيد الموقف من البداية وإحنا اللي ظلمنا نفسنا باستسلامنا:

"ورضينا بالنار تحرقنا والنار مش راضية بده كله"

حتى شرير الفيلم توفيق الدقن استجاب لموجة التغيير وغنى معاهم:

"يا للي ظلمتوا معاكوا الدنيا مالها الدنيا"

يخلص الفيلم 

فيلم مولد يا دنيا

اللي كل حاجة وقتها اتحدت عشان تطلع عمل عظيم زي ده..

من أول وفرة الفنانين لحد جمهور متذوق ومزاج عام سامح

مرورا بالإيمان بدور الفن في ترقي المجتمع..

وتنزل لمولد الدنيا الحقيقي

تلاقي الفيلم مكنش أكتر من حلم

تدور على نفس الوشوش اللي كانت في الحلم ماتلاقيهاش 

وتلاقي نفسك بتتكعبل طول حياتك في ناس شبه الملايكة بس جواهم قبح.

شمعي أسعد 

#تأملات_على_الصحراوي

المقال على اليوم السابع 

https://www.youm7.com/7024579

من يوم ما سافرت لحتة بعيد

 طب عارف؟

من يوم ما سافرت لحتة بعيد

وأنا فجأة 

بقيت خايف

أنا فجأة 

بقيت عيل

تاه والدنيا بتليل

وطول السكة 

مش شايف

أقولك حاجة تستعجب؟

أنا لسة بشوفك حي

كأنك بس متغرب

ومستني أشوفك جاي

كأنك كنت بتجرب 

ويوم ورا يوم

وشهر في شهر

وأنا واقف محلك سر

أقولك سر؟

أنا خايف..

....

الذكرى السنوية للغالي إيليا سمير

قاللي كام كلمة

 حين لحن وغنى عبد الوهاب سنة 1953 كلمات مأمون الشناوي: "قاللي كام كلمة.. يشبهوا النسمة في ليالي الصيف" لم يكن يدري أن صدى تلك الكلمات المتوسلة بهذا اللحن الناعم ستظل لعقود تطيب خاطر كل من يحصل بعد انتظار على كلمة طيبة من شخص بعينه.. سواء كان حبيبا أو صديقا.. أو شخصا مميزا يمنحك بكلماته شهادة تقدير.. فتلطف جروحك.. أو اعترافا بحب فيمنحك الدفء.. أو اتصالا هاتفيا يشعرك بالونس.. أو فقط يدردش معك في وقت لست فيه بخير.. فيأتي الخير.. وتأتي نسمات الصيف من خلال كلمات تشبهها.

#تأملات_على_الصحراوي

أنا زي يونان

 أنا مش هربان 

أنا زي يونان

محبوس في القمقم

ليا زمان

حطاني الدنيا حط ف حط

وحدفني البحر لموج ورا موج

معرفش إزاي هوصل للشط

ولا شايف وسط العتمة خروج

وف لحظة لما واجهت الموت

بلعني الحوت

وف بطن الحوت

حسيت بأمان

#تأملات_على_الصحراوي

قلبك مش جدع

 تكتشف لحظة فراق

إن قلبك مش جدع

وإن السلام

وقت الوداع 

بيجيب صداع 

ويجيب وجع

#تأملات_على_الصحراوي

ابتديها بقلب صافي

 ابتديها بقلب صافي

حط خطة للتعافي

اشغل الأيام بغنوة

هات لقلبك حاجة حلوة

طلع الطفل اللي خافي

لو واخدها جد.. تتعب

ولو هتلعب يبقى تلعب

بالطريقة الاحترافي

شمعي أسعد 

#2025

#تأملات_على_الصحراوي

أنا بايظ ومتلخبط

 أنا بايظ 

ومتلخبط

انا خايب

وبستعبط

أنا جايز

أكون عايز

نجوم أبعد 

وبتشعبط

حبالي الدايبة

مش واصلة

وإيدي الخايبة

مش طايلة

وكل محاولة

معتلة

وأقول يمكن

هاتتظبط

وأنا شبطان 

ومتعشم

في حظ تمللي 

متبرشم

أنا الجاني.. 

أم المجرم؟

أم زي ما قولت

متلخبط

..

شمعي أسعد 

#تأملات_على_الصحراوي

وبهزارك

 وبهزارك

تداري الجرح لو  مجروح

تداري الحزن لو مفضوح

توارب قلبك المفتوح

على البحري..

تداري الخيبة بالضحكة

تلم الكسر والفكة

تداري انك على تكة

ومن بدري..

وبهزارك

تخبي الحيرة والأحلام 

تخبي الخوف من الأيام

وإن العمر ماله لجام

وبيجري..

شمعي أسعد 

#تأملات_على_الصحراوي

الحزن ليه زارع

الحزن ليه زارع 

جوة القلوب زرعه 

وزرعه ليه فارع

 برة الحدود فرعه

الحزن ليه غالب

القلب ليه مغلوب

انا قولت مش لاعب

بتجيبنى ليه مسحوب

لو قلبي يوم حارب

حضنك يكون درعه؟

شمعي أسعد 

#تأملات_على_الصحراوي

وأنا ما زلت أنتظر

 ما الذي حدث؟

كيف انتشرت الفوضى بداخلي..

كيف استبد بي القلق كطاغية والخوف كدكتاتور..

وكيف صرت عدو نفسي حتى إن محور المقاومة خاصتي جعل حدودي مباحة فأتاح اختراقي..

كيف تمكن الحزن من تطويقي محاولا اقتحامي واحتلال قلبي من النيل إلى الفرات..

فصرت محطما كغزة.. 

مهزوما كسوريا..

يائسا كلبنان.. 

قلقا كالأردن.. 

عابثا كاليمن

ورغم غموض ما هو آت

لا يفارقني الحلم..

بأنني سألقي بكل مستبد

في جب كسجن صيدنايا

طالما أنت هناك

ثابتا كمصر تنظر لي ملوحا بالأمل.. 

 وأنا ما زلت أنتظر

#تأملات_على_الصحراوي

تَحَرَّرْ

 تَحَرَّرْ تَحَرَّرْ

فخيرُ انتصارْ

ألَّا يكونَ هناكَ انتظارْ

تَعالَ نحبُ الأمورَ المُعادَة

بغيرِ تَذَمُّر.. فليس فِرارْ

تَعالَ نحبُّ الحياةَ المُعادةْ

فإنا خُلِقنا بِغَيرِ اختيارْ

شمعي أسعد 

#تأملات_على_الصحراوي

أنا مسامح

 أنا مسامح

في نظرة عين بترميها 

وتجري بعيد

أنا مسامح

في لهفة وشوق وتنهيدة

وحزن جديد

وانا مسامح 

في عمر معاكي بيعدي

في حيرة تجيبني وتودي

في قصة نعيدها م الأول 

وأعيشها تاني أنا لوحدي

..

أنا جايلك بألف سؤال

وانتي بعيد عن الأول

تموت اللهفة بالإهمال

يعيش الحزن ويطول

وأنا مسامح

شمعي أسعد 

#تأملات_على_الصحراوي

ولسة مشوار الحياة شايل لنا وقفات

 النهارده الصبح كان عندنا معاد فى مستشفى ايادى لمتابعة تعب قديم عند صابرين.. واحنا واقفين على البحر عشان نركب.. عربية رجعت بضهرها فخبطت صابرين وحدفتها على الأرض.. صاحب العربية نزل وأنا من خضتى على صابرين فضلت ازعق فيه وازقه بعنف.. مكنش بيحاول يصدني وفضل يقولى من حقك وتعالى نروح اى مستشفى نعمل إشاعة.. سندتها وركبنا معاه لحد اول مستشفى وهو سبقني يحجز ويحاسب.. حاولت ادفع رفض تماما.. حجزنا وقالى عشر دق وجاى على ما تدخل الأشعة.. خلصنا الأشعة وانا متوتر جدا مش بس بسبب الخبطة لكن لأننا اصلا حاجزين معاد فى مستشفى ايادى المستقبل عشان نتطمن على حاجة اصلا قلقانا.. الأشعة طمنتنا ومفيش كسر والكدمات مقدور عليها.. هو اتأخر برة وانا خلصت ولقيت الاستقبال بيطلب باقى فلوس فدفعتها ومشيت.. وعلى الرصيف المقابل للمستشفى وقفنا نركب لمشوارنا الاصلى .. لقيته رجع ودخل المستشفى يدور علينا فرجعتله و عند الريسبشن راح يكمل باقى الحساب فالموظف قاله خلاص انا دفعت.. اتاريه سابنا عشان يروح يسحب فلوس يكمل حساب الأشعة.. بعدها صمم يوصلنا مستشفى ايادى.. ولأن صابرين كانت موجوعة من الكدمات فقبلت التوصيلة بعد ما اكدلى إنه فاضي تماما.. فى السكة كنت بدأت اشوف الصورة بوضوح أكتر وانه كان ذوق جدا وبيحاول يكفر عن خطأه بكل الطرق فاعتذرتله على انفعالى.. رفض اعتذارى وقالى ماتعتذرش عشان ده حقك ولو عملت أكتر من كده مكنتش هزعل.. حاولت اديله الفلوس رفض.. وباقى المشوار بدأنا التعارف.. حكالى عن شغله وإنه مهندس ميكاترونكس وحكيتله ان فادى ابنى بيدرس ميكاترونكس.. حكاية تجيب حكاية.. لحد ما سألته ليه كنت بترجع لورا.. مع ان طريق البحر مفهوش كده.. قالى انا جيت ادخل شارع البيت بتاعى فسرحت وفاتنى فحبيت ارجع حتة صغيرة.. وقالى انه كان سرحان لأن فيه ابتلاء فى حياته مضايقه فمن انشغاله بالتفكير فيه مخدش باله وحتى لما رجع بضهر العربية ماركزش مع المرايات.. طلبت منه يفضفض لو يحب قالى انا بحاول انسى فخلينا نتكلم عن الولاد وانشطتهم عشان ابعد تفكيرى.. 

من ناحية تانية هو عرف احنا رايحين فين ونازلين قلقانين إزاى..

كملنا المشوار وهو صمم يفضل معانا لحد ما خلصنا كشف عشان يرجع بينا.. وطول الوقت بيحكي عن شغله وظروف سفره وبعده عن بيته..

اكتشفت.. غير إنه إنسان راقي.. إننا كلنا عبارة عن قصص.. والحادث مكنش عربية خبطت حد

لا

ده قصتين اتقابلوا 

وان فى لحظة الاشتباك الأولى مش بنشوف ده

انا مثلا شوفت الراجل فى لحظة الحادثة مجرد حد مستهتر.. ماشوفتش القصة اللى ورا المشهد ولا شوفت حزنه وسرحانه

 كنت شايف قصتي انا بس 

و الطرف الآخر دخيل فى حكايتي.. عشان كده كنت بصرخ فيه وبقوله انت طلعت لى منين..

لكن فى الحقيقة مفيش صدف وكل موقف وراه حكمة وحكاية

كل لقطة وراها قصة 

كل وش مكشر ع الصبح وراه قصة..

موظف الأمن فى شغلى اللى كان مهموم مرة وسالته مالك فحكالى عن بنته ام سنتين اللى وقعت على راسها ومستنى القبض عشان يعملها اشعة مقطعية .. فطلعت التكشيرة قصة

الناس اللى بنشوفهم فى مستشفى ايادى المستقبل لعلاج الأورام هما قصص فى أعلى حالات الدراما .. وكل واحد هناك هو البطل اللى بيخوض حربه مع التنين اللى بيطلع نار من بقه.. هو البطل اللى بيفضل مش فاهم إزاى الحياة ورطته لحد ما لقى نفسه بيواجه أسوأ مخاوفه.. ومش عارف مين غالب ومين مغلوب

إحنا قصص يا جماعة بننزل نقابل قصص تانية.. ولسة مشوار الحياة شايل لنا وقفات

مصطفى فهمي وحسن يوسف

 حسن يوسف فى شبابه كانت اغلب ادواره الشاب الشقي خفيف الظل.. واللى انا مازلت بتملا بهجة كل ما اشوف افلامه القديمة.. لكن فى كبره وشيخوخته اخذته التحولات الايديولجية ذات الطابع الديني المتأثر بثقافة الخليج اللي اخذت مصر كلها فاختفت خفة الظل من ادواره ومن مصر.. ولا نعلم إن كانت بقيت معه في حياته الشخصية أم لا..

لكن دايما كنت بشوف في حسن يوسف مصر بتحولاتها وخلجنتها.. من الروح المصرية الشابة.. لطغيان أثر الثقافة الواردة عليها.. واقع ملموس ومتعاش وحصدنا نتيجته..

فى المقابل مصطفى فهمي.. عرف يحمي نفسه وهو واخوه من التحولات دي.. ففضلوا هم الاتنين قلوب شابة معبرين باستمرار عن مصر المفقودة.. واللي هم كانوا أثر باقي منها.. وبشوف في تمسكهم وحبهم للحياة نموذج لمصر لو مكنش جرى اللى جرى من السبعينات فما فوق أو ربما من قبل كده..

بشوف رحيل #حسن_يوسف اللى هو مصر المتحولة.. ووراه رحيل #مصطفى_فهمي اللى هو مصر المتشبثة.. مفارقة تحكي أمر ما

تأملات_على_الصحراوي

 تخبرنا خرائط السياسة أننا محاصرون.. وتخبرنا الموانئ أن البوابات مغلقة.. ولا مهرب..

تخبرنا خرائط الطقس.. أن ثمة خطر قادم.. وأن الشواطىء لم تعد صديقة.. ولا أمان

تخبرنا السنين أننا نفقد أشياء كثيرة كل عام ولا ندري

تخبرنا الأيام أن الحنين أكثر قسوة من القتال الدائر على الحدود.. وأن الشواطىء تتآكل أحيانا بفعل التغير المناخي مثلما تتآكل نفوسنا بفعل القلق.

#تأملات_على_الصحراوي