مؤامرة هي ولّا ثورة

مؤامرة هي ولّا ثورة . . 

دي القضية والسؤال

هو قال طبعا مؤامرة . . 

هي ردت بانفعال

حد كان مستني دوره . . 

ولما جه زعّق وقال

فوضى واللي وراها خاين . . 

يالّا يا شوية عيال

حد تاني قاله إخرس . . 

هي ثورة مفيش فصال

والمذيع مكنش همّه . . 

غير مساعدة الاشتعال

وان كام إعلان يزيدوا . . 

ينقلوه من حال لحال

ومن قناة لقناة تلاقي . . 

شغالين نفس السجال

والقضية في الحقيقة . . 

غير ما حاصل ع الشاشات

اسألوا الناس في الشوارع . . 

والزقايق والحارات

هي ثورة أم مؤامرة . . 

أم مغامرة وانفلات

اسألوا الناس الغلابة . . 

حلمهم كام مرة مات

كل ثورة تقوم عشانهم . . 

يحلموا بحبة حاجات

واما بتخيّب آمالهم . . 

يلعنوها من سكات

همّكم انتوا الأسامي . . 

همّهم ذُلّ السؤال

--

شمعي أسعد

25يناير2016