أنا زي يونان

 أنا مش هربان 

أنا زي يونان

محبوس في القمقم

ليا زمان

حطاني الدنيا حط ف حط

وحدفني البحر لموج ورا موج

معرفش إزاي هوصل للشط

ولا شايف وسط العتمة خروج

وف لحظة لما واجهت الموت

بلعني الحوت

وف بطن الحوت

حسيت بأمان

#تأملات_على_الصحراوي

قلبك مش جدع

 تكتشف لحظة فراق

إن قلبك مش جدع

وإن السلام

وقت الوداع 

بيجيب صداع 

ويجيب وجع

#تأملات_على_الصحراوي

ابتديها بقلب صافي

 ابتديها بقلب صافي

حط خطة للتعافي

اشغل الأيام بغنوة

هات لقلبك حاجة حلوة

طلع الطفل اللي خافي

لو واخدها جد.. تتعب

ولو هتلعب يبقى تلعب

بالطريقة الاحترافي

شمعي أسعد 

#2025

#تأملات_على_الصحراوي

أنا بايظ ومتلخبط

 أنا بايظ 

ومتلخبط

انا خايب

وبستعبط

أنا جايز

أكون عايز

نجوم أبعد 

وبتشعبط

حبالي الدايبة

مش واصلة

وإيدي الخايبة

مش طايلة

وكل محاولة

معتلة

وأقول يمكن

هاتتظبط

وأنا شبطان 

ومتعشم

في حظ تمللي 

متبرشم

أنا الجاني.. 

أم المجرم؟

أم زي ما قولت

متلخبط

..

شمعي أسعد 

#تأملات_على_الصحراوي

وبهزارك

 وبهزارك

تداري الجرح لو  مجروح

تداري الحزن لو مفضوح

توارب قلبك المفتوح

على البحري..

تداري الخيبة بالضحكة

تلم الكسر والفكة

تداري انك على تكة

ومن بدري..

وبهزارك

تخبي الحيرة والأحلام 

تخبي الخوف من الأيام

وإن العمر ماله لجام

وبيجري..

شمعي أسعد 

#تأملات_على_الصحراوي

الحزن ليه زارع

الحزن ليه زارع 

جوة القلوب زرعه 

وزرعه ليه فارع

 برة الحدود فرعه

الحزن ليه غالب

القلب ليه مغلوب

انا قولت مش لاعب

بتجيبنى ليه مسحوب

لو قلبي يوم حارب

حضنك يكون درعه؟

شمعي أسعد 

#تأملات_على_الصحراوي

وأنا ما زلت أنتظر

 ما الذي حدث؟

كيف انتشرت الفوضى بداخلي..

كيف استبد بي القلق كطاغية والخوف كدكتاتور..

وكيف صرت عدو نفسي حتى إن محور المقاومة خاصتي جعل حدودي مباحة فأتاح اختراقي..

كيف تمكن الحزن من تطويقي محاولا اقتحامي واحتلال قلبي من النيل إلى الفرات..

فصرت محطما كغزة.. 

مهزوما كسوريا..

يائسا كلبنان.. 

قلقا كالأردن.. 

عابثا كاليمن

ورغم غموض ما هو آت

لا يفارقني الحلم..

بأنني سألقي بكل مستبد

في جب كسجن صيدنايا

طالما أنت هناك

ثابتا كمصر تنظر لي ملوحا بالأمل.. 

 وأنا ما زلت أنتظر

#تأملات_على_الصحراوي

تَحَرَّرْ

 تَحَرَّرْ تَحَرَّرْ

فخيرُ انتصارْ

ألَّا يكونَ هناكَ انتظارْ

تَعالَ نحبُ الأمورَ المُعادَة

بغيرِ تَذَمُّر.. فليس فِرارْ

تَعالَ نحبُّ الحياةَ المُعادةْ

فإنا خُلِقنا بِغَيرِ اختيارْ

شمعي أسعد 

#تأملات_على_الصحراوي

أنا مسامح

 أنا مسامح

في نظرة عين بترميها 

وتجري بعيد

أنا مسامح

في لهفة وشوق وتنهيدة

وحزن جديد

وانا مسامح 

في عمر معاكي بيعدي

في حيرة تجيبني وتودي

في قصة نعيدها م الأول 

وأعيشها تاني أنا لوحدي

..

أنا جايلك بألف سؤال

وانتي بعيد عن الأول

تموت اللهفة بالإهمال

يعيش الحزن ويطول

وأنا مسامح

شمعي أسعد 

#تأملات_على_الصحراوي

ولسة مشوار الحياة شايل لنا وقفات

 النهارده الصبح كان عندنا معاد فى مستشفى ايادى لمتابعة تعب قديم عند صابرين.. واحنا واقفين على البحر عشان نركب.. عربية رجعت بضهرها فخبطت صابرين وحدفتها على الأرض.. صاحب العربية نزل وأنا من خضتى على صابرين فضلت ازعق فيه وازقه بعنف.. مكنش بيحاول يصدني وفضل يقولى من حقك وتعالى نروح اى مستشفى نعمل إشاعة.. سندتها وركبنا معاه لحد اول مستشفى وهو سبقني يحجز ويحاسب.. حاولت ادفع رفض تماما.. حجزنا وقالى عشر دق وجاى على ما تدخل الأشعة.. خلصنا الأشعة وانا متوتر جدا مش بس بسبب الخبطة لكن لأننا اصلا حاجزين معاد فى مستشفى ايادى المستقبل عشان نتطمن على حاجة اصلا قلقانا.. الأشعة طمنتنا ومفيش كسر والكدمات مقدور عليها.. هو اتأخر برة وانا خلصت ولقيت الاستقبال بيطلب باقى فلوس فدفعتها ومشيت.. وعلى الرصيف المقابل للمستشفى وقفنا نركب لمشوارنا الاصلى .. لقيته رجع ودخل المستشفى يدور علينا فرجعتله و عند الريسبشن راح يكمل باقى الحساب فالموظف قاله خلاص انا دفعت.. اتاريه سابنا عشان يروح يسحب فلوس يكمل حساب الأشعة.. بعدها صمم يوصلنا مستشفى ايادى.. ولأن صابرين كانت موجوعة من الكدمات فقبلت التوصيلة بعد ما اكدلى إنه فاضي تماما.. فى السكة كنت بدأت اشوف الصورة بوضوح أكتر وانه كان ذوق جدا وبيحاول يكفر عن خطأه بكل الطرق فاعتذرتله على انفعالى.. رفض اعتذارى وقالى ماتعتذرش عشان ده حقك ولو عملت أكتر من كده مكنتش هزعل.. حاولت اديله الفلوس رفض.. وباقى المشوار بدأنا التعارف.. حكالى عن شغله وإنه مهندس ميكاترونكس وحكيتله ان فادى ابنى بيدرس ميكاترونكس.. حكاية تجيب حكاية.. لحد ما سألته ليه كنت بترجع لورا.. مع ان طريق البحر مفهوش كده.. قالى انا جيت ادخل شارع البيت بتاعى فسرحت وفاتنى فحبيت ارجع حتة صغيرة.. وقالى انه كان سرحان لأن فيه ابتلاء فى حياته مضايقه فمن انشغاله بالتفكير فيه مخدش باله وحتى لما رجع بضهر العربية ماركزش مع المرايات.. طلبت منه يفضفض لو يحب قالى انا بحاول انسى فخلينا نتكلم عن الولاد وانشطتهم عشان ابعد تفكيرى.. 

من ناحية تانية هو عرف احنا رايحين فين ونازلين قلقانين إزاى..

كملنا المشوار وهو صمم يفضل معانا لحد ما خلصنا كشف عشان يرجع بينا.. وطول الوقت بيحكي عن شغله وظروف سفره وبعده عن بيته..

اكتشفت.. غير إنه إنسان راقي.. إننا كلنا عبارة عن قصص.. والحادث مكنش عربية خبطت حد

لا

ده قصتين اتقابلوا 

وان فى لحظة الاشتباك الأولى مش بنشوف ده

انا مثلا شوفت الراجل فى لحظة الحادثة مجرد حد مستهتر.. ماشوفتش القصة اللى ورا المشهد ولا شوفت حزنه وسرحانه

 كنت شايف قصتي انا بس 

و الطرف الآخر دخيل فى حكايتي.. عشان كده كنت بصرخ فيه وبقوله انت طلعت لى منين..

لكن فى الحقيقة مفيش صدف وكل موقف وراه حكمة وحكاية

كل لقطة وراها قصة 

كل وش مكشر ع الصبح وراه قصة..

موظف الأمن فى شغلى اللى كان مهموم مرة وسالته مالك فحكالى عن بنته ام سنتين اللى وقعت على راسها ومستنى القبض عشان يعملها اشعة مقطعية .. فطلعت التكشيرة قصة

الناس اللى بنشوفهم فى مستشفى ايادى المستقبل لعلاج الأورام هما قصص فى أعلى حالات الدراما .. وكل واحد هناك هو البطل اللى بيخوض حربه مع التنين اللى بيطلع نار من بقه.. هو البطل اللى بيفضل مش فاهم إزاى الحياة ورطته لحد ما لقى نفسه بيواجه أسوأ مخاوفه.. ومش عارف مين غالب ومين مغلوب

إحنا قصص يا جماعة بننزل نقابل قصص تانية.. ولسة مشوار الحياة شايل لنا وقفات

مصطفى فهمي وحسن يوسف

 حسن يوسف فى شبابه كانت اغلب ادواره الشاب الشقي خفيف الظل.. واللى انا مازلت بتملا بهجة كل ما اشوف افلامه القديمة.. لكن فى كبره وشيخوخته اخذته التحولات الايديولجية ذات الطابع الديني المتأثر بثقافة الخليج اللي اخذت مصر كلها فاختفت خفة الظل من ادواره ومن مصر.. ولا نعلم إن كانت بقيت معه في حياته الشخصية أم لا..

لكن دايما كنت بشوف في حسن يوسف مصر بتحولاتها وخلجنتها.. من الروح المصرية الشابة.. لطغيان أثر الثقافة الواردة عليها.. واقع ملموس ومتعاش وحصدنا نتيجته..

فى المقابل مصطفى فهمي.. عرف يحمي نفسه وهو واخوه من التحولات دي.. ففضلوا هم الاتنين قلوب شابة معبرين باستمرار عن مصر المفقودة.. واللي هم كانوا أثر باقي منها.. وبشوف في تمسكهم وحبهم للحياة نموذج لمصر لو مكنش جرى اللى جرى من السبعينات فما فوق أو ربما من قبل كده..

بشوف رحيل #حسن_يوسف اللى هو مصر المتحولة.. ووراه رحيل #مصطفى_فهمي اللى هو مصر المتشبثة.. مفارقة تحكي أمر ما

تأملات_على_الصحراوي

 تخبرنا خرائط السياسة أننا محاصرون.. وتخبرنا الموانئ أن البوابات مغلقة.. ولا مهرب..

تخبرنا خرائط الطقس.. أن ثمة خطر قادم.. وأن الشواطىء لم تعد صديقة.. ولا أمان

تخبرنا السنين أننا نفقد أشياء كثيرة كل عام ولا ندري

تخبرنا الأيام أن الحنين أكثر قسوة من القتال الدائر على الحدود.. وأن الشواطىء تتآكل أحيانا بفعل التغير المناخي مثلما تتآكل نفوسنا بفعل القلق.

#تأملات_على_الصحراوي

وموجة حر لافحاني

وموجة حر لافحاني 

 ونبرة حزن ماسحاني

 وزحمة ودوشة في الشارع

 وأنا وحدي.. وأحزاني

 وأنا مسافر 

 ورا حلمي اللي لسة بعيد

 ولسة بتوه 

 برغم بداية التجاعيد

 ولسة ببدأ السكة

 ولسة الدنيا مش سالكة

 ولسة عنيكي آسراني

 كأني لسة طفل وليد

 شمعى اسعد

 #تأملات_على_الصحراوي

أصوم وافطر

أصوم وافطر على كلمة 

على غنوة

على نظرة عيون صافيين

أصوم وافطر على بسمة

على نسمة 

تهل في صحبة الغاليين

على صوتك لما يندهلي

على لمة في بيت أهلي 

على لمسة إيدين دافيين

أصوم وافطر على ضمة

على لما

نكون والدنيا متصالحين

كم زرا بداخلك

 كم زرا بداخلك يمكن لأحدهم أن يضغط عليه فتنفجر

زر

اثنان

ثلاثة

أم أكثر 

زر للغضب.. 

إن ضغط عليه أحدهم يستيقظ بركان أو أكثر 

زر للثورة

إن ضغطت عليه تنزل للتو إلى الميدان وتعتصم

زر للأحلام النائمة

زر للحنين

زر الخوف من الأيام القادمة

زر الهموم الساكنة

زر للحب

فالحب مثل الغضب

إن امتلأت به 

بضغطة زر

تنفجر

#تأملات_على_الصحراوي

أن تكبر

 العمر ليس رقما

العمر أحداث تمر.. ومشاعر تختبر 

فأن تكبر

 يعني أن الأحداث تتكرر

 والمشاعر تتكرر

واختبار المرة الأولى للأشياء والمشاعر يقل حتى يكاد ينعدم

فلن يحدث مرة ثانية أن تنهي مرحلة التعليم الأساسي وتختبر فرحة انك تنتقل لمرحلة العمر الأكبر 

ولن تمر ثانية بمشاعر مختلطة مربكة مبهجة مريحة بعد انتهاء آخر امتحان في الثانوية العامة 

ولن تتكرر مشاعر مراهقتك الأولى التي كانت تذيب جبال الجليد في القطب الشمالي

وفرحة تخرجك من الجامعة

وانتهاء فترة التجنيد

وسعيك فى الحصول على عمل 

ومسكة الإيد الأولى

 وربكة القبلة الأولى 

وصناعة ذكرياتك وارتباطك بالأماكن

 ورأيك السياسي الأول

 والمرة الأولى التي تحدثت فيها عن الشأن العام

البدايات التي لا تنسى

والاكتشافات الأولى التي شكلت وجدانك

أن تكبر 

يعني

أن تعيش الأحداث نفسها مرات عديدة 

عودتك من عملك كل يوم

مرورك بنفس الشوارع

نجاح أبنائك كل عام

احتفالك بأعياد ميلادهم 

لذة قهوة الصباح المكررة

حتى الأحداث الجديدة الأولى ستعيشها كشخص خبير لم تعد تبهره البدايات

ستجد في الأشخاص الجدد نفس ما اختبرته مع آلاف الأشخاص الذين مروا بحياتك

أن تكبر

يعني 

 أن الأحداث تتكرر

 والمشاعر تتكرر

والأشخاص تتكرر

والطرق تتشابه 

وطعم قهوة الصباح يتكرر

لعنة الارتباط الشرطي

 لعنة الارتباط الشرطي

تحدث حين تسمع أغنية قديمة تعيد لك ذكريات قديمة 

فينفتح بابا.. خلفه أيام ذهبت واحداث مضت.. وزحام كان هنا ولم يعد.. فترتجف روحك وينتفض قلبك وتنفلت المشاعر.. وتتغير حركة الكواكب.. وتعود الديناصورات ذات الأجنحة.. 

 وتقترب النجوم جميعها لتحلق فوق رأسك.. 

فتتذكر كيف كانت سنين الحنين والحنان

وكيف بدأت الأحلام وكيف صارت

وكيف تغير طعم الحياة ولونها وشكل ملابسها ولحنها المميز

فتعرف بنفسك كيف تحدث العواصف بفعل أثر فراشة رفرفت بأجنحتها حين سمعت مصادفة لحنا قديم

هل انفجرت بشكل جيد؟

 

أحداث #غزة هي مرحلة من مراحل الصراعات البشرية القاسية اللى العالم فشل فى تفاديها، استدعت عندى أحداث سابقة كانت أكثر قسوة ووحشية، زى إلقاء القنبلة الذرية على هيروشيما وناجازاكى، واللى فيلم أوبنهايمر بيعرض قصة اختراع القنبلة وإزاي العالم الفيزيائي أوبنهايمر قدر يجمع أفضل العقول العلمية وأسسوا مدينة علمية كاملة اتعرفت باسم مختبر لوس ألاموس.. عاشوا فيها إقامة كاملة لحد ما اتموا مهمتهم فى الوصول لاختراعهم العظيم اللى هايدمروا بيه البشرية.

وبعد ما نجحوا فعلا فى عمل أول نموذج حقيقي للقنبلة الذرية جربوها فى نفسهم، فى صحراء نيو مكسيكو، وفسروا للسكان المحليين وقتها أصوات الانفجارات إنها انفجارات بأحد مخازن الذخيرة ورفضوا إجلاء السكان، وتقريبا مكنش فيه وقتها إدراك لمخاطر الإشعاع بالشكل الكامل زي دلوقت، لكن على مدار الشهور التالية بدأو يسجلوا حالات إصابة بالسرطان واترفعت قضايا تعويضات كتيرة.

بعد نجاح تجربتهم قرروا إنهم يجربوها على اليابان اللى جرّت رجل أمريكا للحرب العالمية التانية لما عملت كارثة كبيرة هى كمان بتفجير أسطول بيرل هاربر الأمريكي وكان لابد لأمريكا أن تنتقم.

فى فجر يوم 16 يوليو 1945 كان اليوم المقرر لإلقاء أول قنبلة على هيروشيما اللى وقع الاختيار عليها بعد مداولات واقتراحات (آلهة الأوليمب وهم بيقرروا إعدام شعب).. الفيلم هنا مجابش مشاهد وأثر القنبلة لكن ركز أكتر على لحظة تلقي أوبناهايمر نتيجة اختراعه وحصاد جهد وتعب السنين وقلقه وهو بيسمع الخبر على التليفون اللى خلاه يسأل محدثه اللى بلغه بالتفجير سؤال يحمل مفارقة مرعبة: "هل انفجرت بشكل جيد؟"..

سؤال قاسي يطمأن فيه على جودة اختراعه ولا يهم أن أكثر من 150 ألف ضحية قتلهم فى نفس لحظة سؤاله.. 

 وبعد أن اطمأن على قوة تفجير منتجه كان التعقيب الأكثر قسوة: "الجميع ينتابهم شعور الارتياح بشأنها".

وفعلا كانت المشاهد بعد كده بتصور فرحة المشاركين فى المشروع واحتفالهم وسعادتهم بنجاح تجربتهم وحسم الحرب لصالح أمريكا.. وانت بخيالك تقدر تستعدي منظر مدينة بأكلمها اتحولت لجحيم فى لحظة.. وتفتكر الصور الشهيرة لأطفال هيروشيما المتفحمة وانت بتشوف لحظات السعادة والارتياح على وجوه صناع القنبلة.. اللى هم فى الأصل علماء فيزياء عباقرة استخدمتهم السياسة.. فدمروا العالم.

شطرنج

 بمشاعرنا

نلعب الشطرنج مع كل من حولنا طوال الوقت

نحرك حبا هنا 

بغضا هناك

نشتبك بالغضب فنقتل بعض عساكر الخصم

نخسر أمام موجة غضب أكبر فننسحب قليلا

نحزن فنحرك القطع الأهم التي كنا نحتفظ بيها لضرورة محتملة

نضع مشاعرنا على وضع الحياد وقت هدوء المعارك 

يدب الخوف فى أوصالنا فنحرك قطعة مهمة دون رؤية فنتعثر

يدفعنا القلق للبحث عن مسار بديل ونقلات أفضل

نتماسكك

نفكر

نحب

نكره 

نلعب

نحاول أن نمارس الحياة على لوحة الشنطرج مرارا.. 

فنهزم

على خلفية معجزة الشفاء فى كنيسة عزبة النخل

 من كام سنة ركبت الترام أنا وابنى، الترام مكنش زحمة لكن كل الكراسي كانت مشغولة واحنا هاننزل كمان محطتين تلاتة، فوقفنا فى المكان المريح اللى فى ضهر الكراسي وجنب الشباك، الكمسارى جه وقطعنا التذاكر ورجع مكانه فى اول العربية ومن مكانه البعيد شاورلنا بابتسامة مرحبة اننا نروح جنبه وشاورلنا على مكان تانى برضه فى ضهر الكراسي وجنب الشباك، مافهمتش ايه الفرق بين المكانين وليه دعانا نغير المكان رغم اننا كنا مرتاحين فى مكاننا، لكن ابتسامته الودودة خليتنى استجبت بدون تردد، هو اتصرف بنفس لطف حد بيضايف حد فى بيته وبيطلب منه يقعد فى الانتريه بدل الصالون مثلا، بنفس الود ونفس اللطف، كأنه عارفنا، ورغم انى استجبت لكن فضلت مش فاهم هو عمل كده معانا احنا بس ليه؟

المهم نزلنا فى محطتنا ومشينا جنب سور محاوط عمارة تحت الإنشاء مجاورة للمحطة، وحودنا من شارع الترام للشارع العمودى.. مفيش ثوانى سمعنا صوت هبد جامد، رجعت اشوف ايه.. لقينا السور اللى كنا لسة جنبه وقع فجأة، قدرت المسافة اللى بعدنا فيها عنه وقت سقوطه لقيتها هى نفس المسافة اللى الكمسارى خلانا اتحركناها جوة عربية الترام من آخر العربية لأولها، يعنى لو مكنش الراجل ده عمل كده أو لو كنا رفضنا دعوته وفضلنا مكاننا، كنا هانمر جنب السور لحظة سقوطه، ساعتها انا وابنى استغربنا جدا وحسينا ان الراجل ده اتدخل بدون ارادته لإنقاذنا، لا هو كان يعرف ولا إحنا، لكن اعتبرناها تفسير لموقفه غير المفهوم وغير المقصود فى نفس الوقت.. ومازال لحد دلوقت الموقف ده من المواقف الغامضة ومش مفهومة

هل نقدر نعتبر الموقف ده معجزة؟

لو اعتبرنا المعجزة فعل خارق للطبيعة يبقى لا مش معجزة لأن مكنش فيه اى كسر لقوانين الطبيعة

لو اعتبرنا التدخل الخفى الغريب ده فى تغيير مسارنا ومصيرنا معجزة تبقى معجزة

الأمور هنا نسبية جدا والأهم إنها شخصية جدا

تجربة ذاتية بحته صعب نقلها لإثبات أى شيء

يعنى لا تشفع قدام ملحد ولا تنفع لتعزيز مؤمن

لكنها تنفع صاحبها فقط ودايرته المقربة

تهدي أفكاري فى امور معينة لكن معرفش استخدمها كحجة وبرهان فى أى مناظرة

وأظن كل واحد فينا عنده تجارب مشابهة.. عنده معجزته الخاصة اللى تقنعه هو فقط

مهما كانت ظروفك

حتى فى قلب مجاعات أفقر الدول هتلاقى تجليات شبه كده

بس هتكون دايما تجارب شخصية لكل فرد

وعمرك ماهتسمع عن معجزة جماعية توقف المجاعات أو الأوبئة أو الحروب

لأنها رسايل شخصية ليك انت وحدك والريسفير بتاع كل رسالة عند صاحبها فقط

تقدر تحكيها طبعا لكن غيرك مش هايحسها أو يحصد أثرها..

وبالتالى قصة الشفاء اللى حصلت اليومين دول فى كنيسة عزبة النخل مش مهم خالص تشوفها معجزة خارقة أو أكذوبة أو خدعة أو إن الراجل كان مريض فعلا وعنده شلل فعلا لكن لأسباب نفسية والأسباب راحت فقام ومشي وجري فى المكان

مش مهم

احنا مش طرف سواء صدقنا أو لأ

هى رسالته هو فى كل الأحوال.. هو وأسرته ودايرته المقربة

احنا كلنا تحت ضغوط نفسية صعبة السنين اللى فاتت وكلنا متعلقين بأمل ما، وكل واحد مستنى معجزته

وفى مثل هذه الظروف هاتكتر حكايات من النوع ده فمانستكرتش على بعض

وأحب فى التعليقات أقرا رسايل من النوع ده للى وصلته رسالة